iklan

SOSIEDADE SIVĺL

UNEJUSMA prontu tane interese Estadu hodi aselera dezenvolvimentu

UNEJUSMA prontu tane interese Estadu hodi aselera dezenvolvimentu

Funsionariu EDTL,EP halao hela instalasaun ba lina eletrisidade iha area kolmera Dili, segunda 25/10/2021.Imajen Tatoli/António Gonçalves

DILI, 01 jullu 2022 (TATOLI)-Unidade dos Estudante e Juventude Suco Manelobas (UNEJUSMA) hosi postu administrativu Maubisse, munisípiu Ainaru, liuhosi konferénsia imprensa deklara prontu tane interese Estadu ne’ebé a-favór ba dezenvolvimentu.

“Ami mós husu ba inan-aman, veteranu sira no autoridade lokál atu servisu hamutuk bainhira kompañia ne’ebé hetan ona fiar husi Governu hodi ba hala’o servisu iha baze”, portavós atuál Sekretáriu Jerál UNEJUSMA, Julião Tilman, ba jornalista sira iha Kafetária Uma Knua, Motael, sesta ne’e.

UNEJUSMA, nia dehan apresia tebes ba desizaun governu ne’ebé lideradu hosi Primeiru-Ministru, Taur Matan Ruak, ne’ebé a-favór ba populasaun nia nesesidade.

“Ami apresia tebes ba desizaun ida ne’ebé a-favór ba populasaun nia nesesidade, liuliu fó naroman hodi populasaun sente no aproveita mehi ne’ebé sira rasik defende iha luta ba líbertasaun nasionál”, nia afirma.

Maske nune’e, nia husu ba Governu atu tetu ho didi’ak molok hasai desizaun hodi atribui konfiansa ba kompañia sira. UNEJUSMA prefere fó ba kompañia nasionál, karik mós tenke ida ne’ebé servisu hamutuk ho kompañia lokál, komunidade, veteranu no autoridade lokál.

Tanba ne’e, UNEJUSMA nu’udar estudante no juventude alerta no prontu hodi akompaña prosesu ne’e tomak, nune’e labele iha impedimentu. Hanesan, Manelobas oan prontu atu hamriik iha interese sira ne’ebé a-favór ba dezenvolvimentu tuir mehi funu nain sira nian.

“UNEJUSMA husu nafatin ba VIII Governu ne’ebé lideradu hosi Jenerál Reformadu Taur Matan Ruak, atu servisu maka’as nafatin, nune’e bele lori naroman besik ba povu, liu-liu suku sira ne’ebé oras ne’e seidauk asesu ba liña eletrisidade”, akresenta.

Kompañia UKA II Unipessoál Lda, ne’ebé manán konkursu hodi instala eletrisidade iha Manelobas, UNEJUSMA  husu atu kumpri dever ho responsabilidade hodi finaliza projetu ne’e tuir data ne’ebé termina ona iha kontratu ho kualidade.

Suku Manelobas, nia haktuir la asesu liña eletrisidade hahú kedas ukun rasik aan to’o agora. “Aami Manelobas sai primeiru ba luta ukun rasik aan no segundu ba nakukun dezenvolvimentu”, dehan nia.

Nia informa bainhira finaliza dada eletrisidade ba suku Manelobas sei benefisia populasaun 1469 ho totál família uma kain hamutuk 310, iha aldeia haat hanesan aldeia Ernaro, Hautilo, Hautei no Koto-Matan.

UNEJUSMA nu’udar organizasaun ida ne’ebé harii iha loron 14 fulan-novembru 2004 ho objetivu halibur estudante no juventude tomak iha suku Manelobas hodi fó kontribuisaun di’ak liutan ba dezenvolvimentu nasionál, hahú husi baze no sai mós nu’udar kontrolu sosiál ba dezenvolvimentu iha rai-laran.

Notísia relevante: PM inaugura eletrisidade liña BT 11,1 Km iha Waibobo

Jornalista       : Nelia Fernandes

Editora           : Rita Almeida

iklan
iklan

Leave a Reply

iklan
error: Content is protected !!