DILI, 08 jullu 2022 (TATOLI)—Jenerál Reformadu, Lere Anan Timur, hateten nia parte prontu atu kandidata an ba Prezidente Partidu Frente Revolucionária de Timor-Leste Independente (FRETILIN) iha kongresu nasionál partidu nian ba dalimak ne’ebé sei realiza iha fulan-setembru 2022.
Notísia Relevante: FRETILIN sei realiza kongresu nasionál dalimak hodi hili estrutura foun
“Ha’u Fretilin sein dúvida ha’u labele nega ha’u-nia responsabilidade iha FRETILIN responsabilidade morál, polítika ba vida nasaun no vida instituisaun partidu ninian,” Lere Anan Timur, deklara ba jornalista sira iha aeroportu internasionál Prezidente Nicolau Lobato hafoin konsulta saúde iha diáspora, sesta ne’e.
Kona-ba forma pakote, nia dehan, seidauk deside agora no iha aban ka bainrua mai sei tuur hamutuk ho ekipa reuniaun hodi konsulta, maibé Lere Anan Timur prefere ninia pakote sei avansa hamutuk ho jerasaun foun iha partidu FRETILIN laran.
“Ha’u di’akliu hakat ho jerasaun foun ida-ne’e mak di’akliu, jerasaun foun barak liu hanesan Rui Maria Araújo, José Lobato, José Manuel Nakfilak ne’ebé envez ha’u hanoin ami katuas ho katuas mak halo pakote, hanoin ne’e di’ak liu lalika. Ne’ebé, di’akliu buka foinsa’e prepara futuru ida-ne’e mak ita dehan renovasaun nian,” nia hateten.
Jenerál reformadu ne’e hateten, forma pakote atu servisu partidu maibé kuandu partidu di’ak bele servi di’ak ita-nia nasaun tanba harii partidu ne’e atu ukun.
Tan ne’e, nia hateten, hafoin reforma hosi vida militár ne’e hanesan ema FRETILIN, entaun fila-fali hamutuk ho kuadru sira reforsa liután partidu di’ak liután.
“Prmeiru reforsa partidu hamutuk ho Mari Alkatiri, Lú Olo no kuadru sira seluk. Se buat ruma la’o naksalak ba hadi’a no se di’ak hotu ita ba reforsa tan atu di’ak liután hodi manán eleisaun parlamentár 2023 bele ukun hadi’a nasaun ne’e,” nia otimista.
Lere dehan, Sekretáriu Jerál Partidu ema ida labele nega ninia obrigasaun nu’udar aman partidu ninian no aman nasaun ninian, hanoin ida-ne’e Mari Alkatiri labele nega.
Kona-ba forsa polítika atu apoiu kandidatura, Lere, seida’uk adianta maibé sei halo esforsu hotu.
Jornalista : Nelson de Sousa
Editór : Cancio Ximenes
