iklan

NASIONÁL, HEADLINE, MUNISÍPIU, SEGURANSA, VIQUEQUE

PNTL Viqueque destaka ekipa task force no BOP iha Uatulari

PNTL Viqueque destaka ekipa task force no BOP iha Uatulari

Komandante PNTL munisípiu Viqueque, Supertendente Polísia, Sebastião Alves Quintão. Imajen Tatoli/Vitorino Lopes da Costa

VIQUEQUE, 20 jullu 2022 (TATOLI)–Komadante Polísia Nasionál Timor Leste (PNTL) munisípiu Viqueque, Superintendente Polísia, Sebastião Alves Quintão, informa, daudaun destaka ona ekipa task force no Batallaun Orden Públiku (BOP) hodi hala’o seguransa ba komunidade iha Uatulari.

Inisiativa ne’e relasiona ho akontesementu entre grupu balun iha suku Afaloikai, postu Uatulari, iha loron domingu (03/07), ne’ebé rezulta ema ida hetan kanek no uma 21 iha aldeia Uaikai hetan estragu inklui kazu krime seluk.

“Hosi akotesementu iha Uatulari, suspeitu na’in-lima tama uluk prizaun preventiva no suspeitu sira seluk kontinua iha prosesu  identifikasaun. Tanba ne’e, Komandu Viqueque halo polítika hodi garante seguransa liuhosi destaka ekipa task force no hetan apoiu hosi  BOP halo patrullamentu hodi fó seguransa ba komunidade. Tanba ami lakoi komunidade balun tauk, balun triste no balun kontente, ami nafatin garante ba ema hotu katak ema hotu-hotu iha diretu atu la’o livre,” Komandante PNTL informa ba Agência Tatoli, iha ninia knaar fatin, Beskem, kuarta ne’e.

Notísia relevante:  Ema deskoñesidu estraga uma 20 iha Afalokai Viqueque

Kolokasaun membru iha postu Uatulari hodi reforsa membru PNTL eskuadra postu Uatulari, aleinde koloka membru PNTL antes ne’e, estabelese ona Konsellu Polisiamentu Komunitáriu (KPK) iha suku sira nune’e sira iha obrigasaun hodi apoiu seguransa.

Maski nune’e, PNTL aprezenta ona kazu iha suku Afaloikai ba Ministériu Públiku (MP) no hasa’e ona ba Tribunál. Hafoin kompleta hotu dokumentu mak sei aprezenta ba MP hodi hein notifikasaun hosi hodi bolu filafali suspeitu sira ba hatan iha Tribunál.

Kazu seluk maka baku malu entre joven iha mate-uma aldeia Liasidi, suku Afaloikai ne’ebé rezulta joven na’in-rua hetan kanek.

“Kazu ne’e PNTL sei kontinua aprezenta ba Ministériu Públiku, maski suspeitu sira deklara katak sira iha relasaun família no sira rezolve ona no simu malu fali, maibé prosesu jurídiku kontinua la’o nafatin, la signifika katak sira rezolve ona, ita tenke hakotu iha eskuadra. Kazu ne’e PNTL iha obrigasaun nafatin aprezenta suspeitu na’in-lima ba Ministériu Públiku,” nia relata.

Notísia relevante:  PNTL Viqueque detein ona suspeitu taa pasajeiru iha Uatulari

Nune’e mós, kazu taa pasajeru hosi postu Uatucarbau ne’ebé halo viajen bá Viqueque, hafoin to’o iha parte Uaidae baliza entre suku Uaitame no suku Matahoi ninia klaran, suspetu ida taa kanek abitante ida hodi rezulta kanek boot iha liman kabun kotuk, iha domingu kalan, ne’ebé iha tersa ne’e PNTL kaptura ona suspeitu no detein ona iha eskudra postu Uatulari.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!