DILI, 25 jullu 2022 (TATOLI)— Diretór Servisu Autónomu Médikamentu no Ekipamentu Saúde (SAMES), Santana Martins husu ba Diretór Saúde Munisipal no Xefe Sentru Saúde, atu esforsu maka’as halo jestaun ba ai-moruk báziku sira ho di’ak iha fasilidade saúde.
“Ita-nia ai-moruk báziku hanesan paracetamol, Amoxicillin, ampicillin no ibuprofen ne’e estoke sufisiente hela, maibé iha kestaun mak resposavel Servisu Saúde Munisipál-sira la esforsu maka’as halo jestaun ho di’ak,” Diretór Ezekutivu SAMES ne’e, hateten iha nia knaar fatin Kampu-Alor, segunda ne’e.
Tanba, nia dehan , loloos komunikasaun ba redistribuisaun ai-moruk ne’e laiha problema tanba uza ona sistema online ne’ebé postu saúde bele redistribui ba sentru saúde sira ne’ebé estoke manus ona.
“Ita agora uza sistema online, se karik sira check iha sistema ne’e mak ai-moruk iha postu saúde ka sentru saúde laiha, sira bele halo jestaun redistribuisaun de’it hosi postu saúde sira ne’ebé mak besik hodi la presiza mai to’o iha nasionál ka SAMES,” nia afirma.
Nune’e, Resposavél ne’e enkoraja ba Xefe Sentru Saúde no Diretór munisípiu no responsavél postu saúde sira tenke halo komunikasaun iha tereñu atu públiku labele kestiona menus estoke ai-moruk.
Daudaun ne’e, SAMES iha tipu ai-moruk 441, hosi totál estoke ne’e tipu 156 ka 35% mak laiha no estoke aimoruk ne’ebé disponivel mak tipu 285 ka 65%.
Alende ne’e, estoke ai-moruk vitál ne’ebé iha hamutuk tipu 93 no estoke mamuk hamutuk 20 ka 22%, estoke esensiál ne’ebé iha hamutuk tipu 178 no estoke mamuk 58 ka 33%. Enkuantu estoke ai-moruk nesesáriu ne’ebé iha hamutuk tipu 81 no estoke ne’ebé mamuk 32 ka 40%.
Notísia relevante: Estoke Aimoruk iha Armazein SAMES hahú menus
Jornalista: Felicidade Ximenes
Editór : Florencio Miranda Ximenes
