Top

Agência TATOLI tenke servisu makaas sai referénsia ba mídia seluk

Konsellu Redasaun Suara Timor Lorosa’e (STL), Domingos Saldanha. Imajen/FB.

DILI, 26 jullu 2022 (TATOLI)—Konsellu Redasaun Suara Timor Lorosa’e (STL), Domingos Saldanha, hateten Agência TATOLI, Imstitutu Públiku (TATOLI, I.P) tenke servisu makaas nune’e bele sai referénsia ba mídia seluk.

Notísia Relevante: Bankada PLP husu Agência TATOLI tenke sai mídia krítiku-independente

“Ajénsia TATOLI tenke hatene no informa hodi públika sai notísia, to’o ikus mak mídia seluk sita ka sai referénsia ba sira,” Konsellu Redasaun Suara Timor Lorosa’e (STL), Domingos Saldanha, hateten ba Agência TATOLI, liuhosi telefónika.

Tanba, nia dehan, Agência TATOLI iha rekursu umanu sufisiente hodi halo sira-nia servisu ho di’ak, tanba hala’o servisu hanesan mídia presiza servisu makaas tan atu bele sai mídia ida-ne’ebé sai modelu ba mídia tomak iha Timor tomak no TATOLI mós sai fatin hodi ema hetan informasaun ne’ebé loos.

Jornalista seniór ne’e iha esperansa katak Agência TATOLI fó sai informasaun ne’ebé kredivél no ho loloos ba públiku, nune’e sai tebes referénsia ba povu tomak liuhosi kualker informasaun ka notísia ne’ebé Tatoli publika.

“Ha’u-nia esperansa ida mak ne’e, Agência TATOLI tenke sai Ajénsia ida-ne’ebé sai referénsia ba mídia tomak no povu tomak, tanba nia iha fasilidade barak no rekursu umanu sufisiente hodi haklaken kualker informasaun saida de’it iha Timor-Leste,” nia dehan.

Karik ba durante ne’e produtu TATOLI ne’e sai referénsia ba mídia seluk, nia hatán, to’o agora seidauk bele sai referénsia ba mídia seluk maibé iha ona sinál pozitivu ida hatudu katak atu sei sai referénsia ba mídia seluk maibé importante mak hadi’a beibeik no hadi’a beibeik.

Tanba, tuir nia. Agência TATOLI daudaun ne’e sei hanesan mós labarik ida-ne’ebé la’o no sidi monu-hamrik no hamriik monu, ne’e hanesan buat baibain ida tanba nasaun mós entaun buat hotu-hotu foin mak aprende buat foun.

“Ne’ebé, se dehan buat idaké sala iha ninia reportajen, ida-ne’e buat baibain ida la’ós buat boot. Maibé, tenke aprende hosi sala atu la’o bebeik no labele desmoraliza bainhira sala ka halo sala ruma. Desmoraliza servisu nafatin, hadi’a nafatin no aprezenta produtu ne’e di’ak ba beibeik bele sai mídia ne’ebé mak bele kredivél iha loron aban no bainrua,” nia hateten.

Ho nune’e, Konsellu Redasaun Suara Timor Lorosa’e (STL), Domingos Saldanha, lahaluha hato’o parabéns ba Agência TATOLI ne’ebé sei selebra aniversáriu ba dala-VI ne’ebé sei komemora iha 27 jullu 2022.

“Parabéns ba Agência TATOLI ne’ebé kompleta tinan VI iha 27 jullu tinan ne’e,” nia dehan.

Notísia Relevante: PR Horta enkoraja TATOLI kontinua públika informasaun loos ba públiku  

Jornalista : Osória Marques

Editór        : Cancio Ximenes

Publisidade

Leave a Reply

Latest Post

error: Content is protected !!