DILI, 26 jullu 2022 (TATOLI)—Diretór Jerál Sekertária Estadu Arte no Kultura (SEAK), Manuel Ximenes Smith, informa iha prosesu apoiu uma lisan iha tinan 2021 nian ne’e uma lisan Berdato no Hohulo devolve fali osan ba kofre Estadu, tanba la konkorda ho montante orsamentu ne’ebé Sekretáriu Estadu Arte no Kultura (SEAK) fó apoiu.
Notísia Relevante: Governu apoiu $100.000,00 ba konstrusaun Uma-lulik
“Iha tinan kotuk iha Uma lisan rua mak devolve fali osan ba kofre Estadu, hanesan uma lisan Berdato hosi munisípiu Ainaro no uma lisan Hohulo hosi munisípiu Aileu. Hosi uma lisan Berdato ne’e ita haruka osan fila ona no uma lisan Hohulo osan ne’e fila direta ba iha banku,” Manuel Ximenes Smith informa ba Agência Tatoli, iha nia kna’ar fatin, Avenida Portugál, Dili, tersa ne’e.
Uma lisan Berdato lakohi foti orsamentu apoiu hosi Governu tanba lia-na’in sira-nia liafuan la kona malu, balun hakarak no balun lakohi, entaun sira lori osan ne’e mai entrega fila-fali ba SEAK katak hosi parte sira-nian mak seidauk prontu.
“Maibé, iha prosesu hatama proposta sira rasik mak mai hatama proposta ba konstrusaun uma lisan, ita fó apoiu no sira la prontu fila-fali,” nia dehan.
Notísia Relevante: SEAK finaliza ona halo verifikasaun ba proposta uma lisan
Ba uma lisan Hohulo ne’e, sira hatama proposta ba iha konstrusaun maibé bainhira planu verifikasaun ekipa téknika tun ba iha terenu to’o ba fatin ne’ebé halo uma lisan bá, uma ne’e kuaze konstrui hotu ona entaun kestaun konstrusaun ne’e ekipa la konsidera, tanba prosesu iha terrenu hatudu katak uma lisan Hohulo ne’e tama ona iha faze inaugurasaun.
“Ita konsidera konstrusaun bainhira to’o sasán foin halibur no foin komesa konstrui uma ne’e, maibé kuandu konstrusaun uma ne’e hotu ona no uma-na’in bele dehan konstrusaun mós kuandu planu verifikasaun tun ba haree katak ida-ne’e tama iha prosesu inaugurasaun, ita tenke tuir, tanba uma halo hotu ona. Entaun, uma lisan Hohulo ne’e sira rasik lakohi foti osan, tanba osan ne’e ho montante $1500, ne’ebé osan ne’e husik de’it iha banku to’o ikus nia fila direta ba kofre Estadu,” nia dehan.
Ho ida ne’e signifika katak laiha kuñesimentu di’ak ba persentajen hodi kategoriza planu verifikasaun ba iha katégoria inaugurasaun, konstrusaun no reabilitasaun mak mosu kontradisaun entre lia-na’in sira ho SEAK.
Tanba, nia dehan, fó apoiu ba proposta uma lulik iha katégoria tolu (3) ida mak kategória konstrusaun ho orsamentu $3500, daruak kategória reabilitasaun ho $2500 no seluk kategória inaugurasaun ho orsamentu $1500.
Ho ida ne’e, nia parte espera katak iha tinan 2022 labele akontese tan situasaun hanesan ne’e, tanba sira hotu tenke klareza ba informasaun bainhira sira mai asina kontratu tama iha prosesu lansamentu asina kontratu ne’e, katak sira hotu iha ona klareza ba esplikasaun hosi Diretór sira, nune’e labele mosu tan dezitendimentu.
“Ba ba tinan ne’e espera osan tama sira simu de’it, nune’e bele hadi’a sira-nia uma lisan no hetan finalizasaun,” nia apela.
Notísia Relevante: 2021, SEAK apoia konstrusaun uma lulik 82 iha territóriu nasionál
Jornalista : Nelia Fermandes
Editór : Cancio Ximenes
