PR-MAP diskute kria fundu kafé-kampaña nasionál reabilitasaun kafé

DILI, 29 jullu 2022 (TATOLI)–Prezidente Repúblika (PR), José Ramos Ramos Horta, sesta ne’e simu audiénsia ho Ministru Agrikultura no Peska (MAP), Pedro Reis, ho ekipa hodi diskute kriasaun fundu kafé no kontinusaun kampaña nasionál reabilitasaun kafé.

Notísia Relevante: PR Horta husu povu TL hadomi kafé nu’udar kultura nasionál

“Enkontru ohin ne’e Prezidente Repúblika mak konvida ko’alia koordenasaun servisu ligadu atividade MAP no ita ko’alia liu ba iha atividade ne’ebé foin lalais ita hala’o iha Railaco reabilitasaun kafé. Planu kontinuasaun sei mai tan iha 04 agostu iha Aileu, Ainaro no mós planu atividade tékniku  ne’ebé ajusta hamutuk ho Prezidente Repúblika ba futuru,” Ministru Pedro Reis hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite, Dili, sesta ne’e.

Notísia Relevante: PR lansa kampaña programa “Nutrisaun Di’ak, Povu Saudavél, Nasaun Forte” iha Railaco

Durante sorumutu ko’alia kona-ba reabilitasaun kafé liga ba Orsamentu Retifikativu  (OR) ne’ebé MAP propoin ho mós hanoin Xefe Estadu nian kona-ba kriasaun fundu kafé.

“Entaun hanesan ministéiru tékniku presiza halo koordenasaun di’ak tanba atu implementa ne’e ideia mai hosi Prezidente Repúblika maibé atu implementa ne’e ministéiru parte tékniku mak implementa, ida-ne’e mak koordenasaun,” nia dehan.

Governante ne’e konsidera, ideia hosi Prezidente Repúblika kona-ba kria fundu kafé ida-ne’e di’ak tebes oinsá dezenvolve aumenta produsaun kafé no proteje folin kafé.

“Hanoin ne’e di’ak, tanba ita-nia kafé ne’e bele sai kafé na’in hafoin prodús ita-nia agrikultór sira nafatin ki’ak, entaun baralla hosi merkadu internasionál. Nune’e hosi Prezidente Repúblika no Primeiru-Ministru atu halo fundu kafé atu nune’e merkadu folin monu Estadu tenke sosa hotu armazenamentu depois haree folin di’ak mak Estadu mak sei fó sai,” nia hateten.

Ministru fó sai katak, totál kafé iha territóriu hamutuk ektare 59.921 no ministéiru nia programa hala’o hela reabilitasaun kafé tuan ektare 2000 de’it tanba  alokasaun orsamentu la boot no ho Orsamentu Retifikativu bele expande aumenta liután.

“Ministéiru nia programa  ba inplementasaun reabilitasaun kafé la’o hela  halo rezumidasaun ba ektare 2000,  maibé MAP servisu hamutuk ho parseiru dezenvolvimentu no setór privadu hanesan ACT, CCT no sira halo reabilitasaun kafé besik ektare 8000-resin,” nia dehan

Ida-ne’e ajusta hamutuk hosi totál kafé ektare 59.921 iha ektare ne’ebé fó produsaun di’ak 190 kilograma kada ektare. maibé sira seluk ne’e produsaun ki’ik tanba ita laiha forsa ne’ebé mak atu halo reabilitasaun ba kafé tuan ne’ebé agora daudaun iha, nune’e ho orsamentu ne’ebé mai bele expande liután.

Notísia Relevante: Governu planeia define folin kafé

Jornalista : Nelson de Sousa

Editór      : Cancio Ximenes