DILI, 02 agostu 2022 (TATOLI)–Institutu Politékniku Betano (IPB) prontu simu avaliasaun hosi Ajénsia Nasionál Avaliasaun Akreditasaun Akadémiku (ANAAA) tanba antes ne’e sira halo ona preparasaun durante fulan-neen, hahú kedan hosi janeiru.
“Ami-nia preparasaun ba avaliasaun ne’e hahú kedan hosi fulan hirak nia laran. Agora hakarak ka lakohi ami tenke hasoru. Ha’u garante pasa hela, ami-nia alvu ne’e bele hetan klasifikasaun A to’o B, ne’ebé pasa ne’e klaru ona,” Prezidente IPB, Acácio Cardoso Amaral, hateten ba Agência Tatoli, via telefónika, tersa ne’e.
Notísia relevante: ANAAA halo avaliasaun atu hadi’a kursu no instituisaun sira
Kona-ba preparasaun rekursu umanu, IPB daudaun ne’e sufisiente tanba instituisaun kiik no iha ona hanoin balun atu loke tan kursu foun iha eskola superiór ne’ebé eziste, maibé labele akontese tanba infraestrutura la permite.
“Ho kursu rua ne’ebé eziste hanesan produsaun animál ho konstrusaun sivil iha rekursu naton atu la’o, la’ós perfeitu maibé di’ak liu bainhira IPB inisia, tanba iha dosente permanente hamutuk 16 no estudante 440,” nia akresenta.
Hosi avaliasaun ne’e rasik, tuir IPB nia estimasaun atu realiza iha juñu no jullu, maibé la konsege entaun foin ANAAA informa katak agostu fulan maka fiksa ona.
Jornalista : Tomé Amado
Editora : Julia Chatarina
