EDUKASAUN, HEADLINE

MESSK apoiu fundu $250.000 ba grupu universitáriu no kulturál

MESSK apoiu fundu $250.000 ba grupu universitáriu no kulturál

Osan dolar Amérika. Imajen/Espesiál

DILI, 05 agostu 2022 (TATOLI)–Ministériu Ensinu Superiór Siénsia no Kultura (MESSK) hetan alokasaun orsamentu ba tinan fiskál 2022 ho montante millaun $5.186,739.00, ne’ebé hosi montante ne’e, prevee fundu $250.000 hodi apoiu grupu universitáriu no grupu kulturál sira.

“Ita iha apoiu orsamentu ba grupu kulturál ho universidade sira. Iha apoiu ne’e ita tau fundu hamutuk $250.000 hodi tulun sira-nia atividade,” Diretór Jerál Administrasaun Finansa MESSK, Hernânio Viterbo da Costa, informa ba Agência Tatoli iha ninia knaar fatin, Colmera, sesta ne’e.

Notísia relevante: MESSK ezekuta ona 58,05% hosi OJE 2022

Hosi orsamentu ne’e, ministériu prevee ba kada grupu depende ba nesesidade no hosi kada grupu kulturál, ministériu sei fó hosi $1.500 to’o $2.500, maibé depende ba proposta ne’ebé submete.

“Ita iha komisaun ne’ebé simu ona despaixu hosi Ministru atu hala’o ninia kompeténsia hodi analiza no avaliasaun ba proposta sira hodi haree ida ne’ebé maka bele suporta. Kuandu loos hotu bazeia ba regra no alvu ne’ebé ministériu hatuur, komisaun rasik sei hato’o rekomendasaun ba Ministru hodi halo aprovasaun no bainhira aprova maka komisaun halo publikasaun hafoin bolu grupu sira hodi asina,” nia akresenta.

Ba uma-lulik rasik fundu ne’ebé ministériu prevee ona entre $1.500 to’o $3.500, depende ba kondisaun, balun grave loos sei hetan to’o $3.500, maibé balun kuandu iha prosesu verifikasaun mak hein de’it atu inaugura entaun sei fó tuir nesesidade.

“Ita lakohi atu mosu persepsaun ida dehan uma-lulik sira ne’e Governu mak halo, maibé ita ninia intensaun atu suporta liuhosi subsídiu ida atu apoiu sira hodi halo uma-lulik,” nia dehan.

Aleinde ne’e, ministériu mós prepara ona fundu ba grupu universitáriu, ne’ebé kada grupu sei hetan $2.000 to’o $3.000 konforme atividade estrakurrikulár ne’ebé prepara, hafoin konforme mós disponibilidade orsamentu ne’ebé ministériu prevee.

“Ita iha limitasaun orsamentu, entaun ita haree ida-ne’e hahú uluk ho orsamentu kiik. Bainhira tinan oin ita haree programa ne’e la’o di’ak, ita sei diversifika tan atividade sira hodi fó tan apoiu,” Diretór kompromete.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!