EDUKASAUN, HEADLINE

MESSK ezekuta ona 58,05% hosi OJE 2022

MESSK ezekuta ona 58,05% hosi OJE 2022

Osan Dolar Amérika. Imajen/Espesiál

DILI, 05 agostu 2022 (TATOLI)—Ministériu Ensinu Superiór Siénsia no Kultura (MESSK) ezekuta ona Orsamentu Jerál Estadu (OJE) 2022 atinje 58,05% hosi totál atuál, obrigasaun no kompromisu, iha segundu trimestrál to’o fulan-jullu.

“Ami-nia orsamentu ne’ebé aloka iha tinan fiskál 2022 ne’e iha $5.186,739, normalmente kada fulan ami atualiza progresu ezekusaun atividade no ninia gastu,” Diretór Jerál Administrasaun Finansa hosi MESSK, Hernânio Viterbo da Costa, informa ba Agência Tatoli, iha ninia knaar fatin, Colmera, sesta ne’e.

Orsamentu 2022 ba MESSK hamutuk $5.186.739, fahe ba kategoria saláriu no vensimentu $1.805.901, bens no servisu $2.871.838, transferénsia públika $ 314.000 kapitál menór laiha, no kapitál dezenvolvimentu $ 195.000.

Orsamentu ne’ebé aloka ba MESSK iha programa prioridade tolu, kompostu hosi programa kultura no patrimóniu ho orsamentu $1.215.876, boa governasaun no jestaun institusionál $2.158.828 no edukasaun no formasaun $1.812.035.

Notísia relevante: MESSK ezekuta ona 30,5% OJE 2022

Tuir Diretór Jerál, orsamentu ne’ebé MESSK simu, ninia ezekusaun atuál ne’ebé sai ona hosi sistema ba ema nia konta no mós halo ona levantamentu hamutuk millaun $2.558.326,55, ekivalente 49,32%.

Iha mós orsamentu obrigasaun nian, ne’ebé tenke selu inklui mós kontratu balun ne’ebé halo hosi aprovizionamentu ho pagamentu parsiál tuir progresu ne’ebé atinje hamutuk $438.440,51, ekivalente ba 8,4%, nune’e mós iha kompromisu ho totál $13.998.61, ekivalente 0,03%.

Hosi saldu orsamentu ne’ebé sei iha hela sistema MESSK nian, hamutuk $2.175.973,79, ekivalente 42% no ninia taxa ezekusaun totál hosi atuál obrigasaun no kompromisu to’o fulan-jullu ne’e hamutuk 58,05%.

Enkuantu, totál orsamentu $5.186.739 ne’ebé aloka ba MESSK ne’e gastu barak liu ba programa kultura hanesan festivál kulturál no apoiu uma-lulik, apoiu mós maluk defisiente sira liuhosi programa formasaun edukasaun inklui apoiu estudante sira iha atividade ekstra-kurrikulár no apoiu atividade ba fórum konsellu reitór sira.

Totál programa prioridade MESSK ba tinan 2022 ne’e iha tolu, ho sub programa hamutuk 20 resin, ne’ebé hosi programa prioridade tolu ne’e maka hanesan edukasaun informasaun, kultura patrimóniu, no boa governasaun ka hanaran funsionamentu institusionál.

Hosi programa prioridade sira ne’e MESSK halo mós despeza transversál, katak programa sira ne’e atu la’o tenke iha apoiu ba mina inklui mós manutensaun ba karreta hodi bele fó suporta.

Nune’e, Diretór Jerál iha espetativa to’o fulan-setembru molok finaliza ezekusaun trimestrál datoluk, ezekusaun orsamentu bele atinje 75%.

“Daudaun ami besik ona atinje 60%, ne’ebé hela de’it 17%. Kada fulan bainhira ami atinje 8 to’o 9%, fiar katak molok ami ba halo aprezentasaun iha Parlamentu Nasionál, ami nia taxa ezekusaun bele atinje 75%. Signifika atividade ne’ebé ministériu halo to’o setembru ne’e ezekusaun finál, atu nune’e ba oin to’o dezembru presiza halo de’it ona konsolidasaun ba relatóriu hodi submete ba Parlamentu hodi diskute tan orsamentu ba tinan 2023 nian,” nia otimista.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!