BOBONARO, DEFEZA, HEADLINE, MUNISÍPIU, SEGURANSA

Ekipa konjunta halo apreensaun mina ilegál tonelada hitu hosi Atambua

Ekipa konjunta halo apreensaun mina ilegál tonelada hitu hosi Atambua

Ekipa konjunta komposta hosi UPF, BOP no F-FDTL foto hamutuk ho Sidadaun na'in-tolu ne'ebé hatama mina ilegál hosi Atambua mai territóriu Timor-Leste nian. Imajen Tatoli/Sérgio da Cruz.

BOBONARO, 08 agostu 2022 (TATOLI) – Ekipa konjunta Polísia Nasionál Timor-Leste (PNTL), komposta hosi Unidade Patrullamentu Fronteira (UPF), Batallaun Orden Públika (BOP) hamutuk ho FALINTIL-Forsa Defeza Timor-Leste (F-FDTL), halo apreensaun mina ilegál hamutuk tonelada hitu ne’ebé sidadaun na’in-tolu hatama hosi Atambua, munisípiu Belu, Repúblika Indonézia mai territóriu Timor-Leste liuhosi fronteira terrestre munisípiu Bobonaro.

Komandante UPF, Superintendente Euclides Belo, informa sidadaun hirak-ne’e ekipa konjunta deteta iha mota-laran área Nunura, aldeia Manu-Aman, suku Tapo-Memu, postu administrativu Maliana, munisípiu Bobonaro.

Notísia relevante: UPF detein sidadaun na’in-rua hatama mina-rai no sigarru ilegál iha fronteira

Ekipa koordenada halo apreensaun ba sasán kontra bandu hirak-ne’e durante loron rua nia laran, hahú hosi sábadu loron (06/08) to’o segunda (08/08) konsege rekolla gazolina no gazoel litru 35 hamutuk masa 91, inklui tabaku joker marka matahari karton tolu no joker metan karton ida.

Mina ilegál hirak-ne’e sidadaun sira hatama uza meiu sira hanesan, balun subar helik iha mota-ninin, pertense Indonézia nian, kesi masa jerigen hamutuk ho tali husik, depois husik tuir bee mak lori ba to’o balun simu fali-tali, rohan iha mota-ninin parte Timor-Leste nian.

“Totál kombustível ne’ebé ita halo apreensaun kuaze tonelada hitu, kuandu ita soma ba folin mina ne’ebé agora daudaun iha Timor-Leste bele hetan $11 mil, depois folin joker, tabaku bele hetan ninia lukru osan kuaze $525 ne’e ami konta tuir saida mak ami hatene,” Superintendente Euclides Belo informa liuhosi komunikadu imprensa ne’ebé Tatoli asesu hosi autoridade seguransa, segunda ne’e.

Superintendente ne’e hatutan, sidadaun na’in-tolu ne’e ho estatutu feto rua no mane ida no oras ne’e sei iha prosesu identifikasaun.

Ekipa konjunta konklui ona prosesu investigasaun hafoin entrega seksaun ba investigasaun komandu munisípiu Bobonaro atu kontinua prosesu ba investigasaun iha Ministériu Públiku.

Komandante ne’e subliña, maske fronteira rai maran Timor-Leste nia luan, maibé ba oin nafatin hatún orden ba membru sira serbisu hamutuk ho F-FDFTL halo seguransa másimu iha liña frontéira ne’ebé durante ne’e sai risku movimentasaun ema inklui sasán ilegál.

Notísia relevante: UPF Covalima entrega uniforme GAM hatama ilegal ba Komandu PNTL

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!