COVALIMA, 08 agostu 2022 (TATOLI)–Jerente Timor Resources, Filomeno Andrade hateten, daudaun ne’e ekipa tékniku sira halo preparasaun atu halo perfurasaun posu Lafaek, iha suku Labarai, postu administrativu Suai, munisípiu Covalima iha fulan-setembru 2022.
Notísia Relevante: Timor Resources deside hapara atividade perfurasaun iha posu Feto Kmaus
“Ami agora halo preparasaun atu halo perfurasaun posu Lafaek iha fulan-setembru nia-laran. Oras ne’e daudaun preparativu hala’o makaas tebes besik atu kompleta ona,” Filomeno Andrade informa ba Agência Tatoli, iha salaun Administrasaun Munisípiu Covalima, segunda ne’e.
Razaun Timor Resources halo preparasaun makaas tebes tanba mina matan posu Lafaek ida-ne’e kle’an ho metru 3,300 foin mak dahuluk halo perfurasaun kle’an iha Timor-Leste.
“Ho perparasaun ida-ne’e buat hotu la’o ho di’ak. Ami sei hein katak ho ekipamentu parte balun sei to’o ho ró, iha loron 27 fulan-agostu ne’e sei monta,” nia dehan.
Ho nune’e, nia dehan, molok atu halo perfurasaun iha posu Lafaek, Autoridade Nasionál Petroleu no Minerál (ANPM) sei halo fiskalizasaun hafoin halo aprovasaun foin mak halo perfurasaun.
Atu halo perfurasun iha posu Lafaek, Timor Resources kontinua hadi’a ekipamentu hodi reforsa liután tanba mina-matan kle’an tebes.
Jornalista : Celestina Teles
Editór : Cancio Ximenes
