DILI, HEADLINE, POLÍTIKA

Alkatiri: mosu pakote barak iha kongresu nasionál FRETILIN dalimak ne’e direitu

Alkatiri: mosu pakote barak iha kongresu nasionál FRETILIN dalimak ne’e direitu

Sekretáriu Jerál Partidu FRETILIN, Mari Alkatiri. Imajen Tatoli /Egas Cristovão.

DILI, 09 agostu 2022 (TATOLI)—Sekretáriu Jerál Partidu Fretilin, Mari Alkatiri, hateten mosu pakote barak hodi kompete sai líder Partidu Frente Revolucionária de Timor-Leste Independente (FRETILIN) iha kongresu nasionál dalimak ne’e direitu ema ida-idak nian.

Notísia Relevante: Kandidata-an ba líder FRETILIN presiza kompleta mandatu tinan-ida sai membru CCF

“Ne’e direitu bele pakote segundu, terseiru no pakote 20 ne’e direitu,” Sekretáriu Jerál ne’e hateten hodi responde jornalista sira iha Palásiu Prezidensiál Nicolau Lobato, Bairru Pite, tersa ne’e.

Alkatiri seidauk ko’alia kona-ba pakote hira mak sei kompete iha kongresu mai no nia hanoin kona-ba  mantein lideransa agora ka fó ba ema seluk, maibé nia parte nafatin iha sentidu responsabilidade.

“Fó ba sé. Hatudu mai hau de’it iha ema ida, imi (jornalista) dehan ha’u bele fó no bele fó, hatudu mai ha’u. Ha’u mak sei toma inisiativa foun maibé ha’u tenke iha sentidu responsabilidade,” nia hateten.

Sekretáriu Jerál Partidu Fretilin ne’e lakohi hatán kona-ba informasaun ne’ebé dehan estatutu partidu FRETILIN taka dalan ba Jenerál Reformadu, Lere Anan Timur, atu kandidatu an ba líder partidu FRETILIN iha kongresu dalimak iha fulan-setembru, maibé ba ida ne’e Lere mós hatene kona-ba estatutu.

“Ha’u la hatán ba ida-ne’e, kamarada Jenerál Lere hatene ona estatutu halo nusa nia mós iha ema bele konsulta. Tan ne’e, estatutu ne’e estatutu. Se taka dalan entaun taka dalan. Se loké dalan entaun loke dalan duni. Ne’ebé, ha’u la komenta ida-ne’e,” nia dehan

Maibé, nia dehan, hanesan jurista bainhira atu halo revizaun estatutu iha kongresu mai fali la’ós ba agora, se lae aban-bainrua ema hotu-hotu tama mai halo revizaun, nia parte mós hakarak sai.

Hatán kona-ba informasaun Lere Anan Timur hahú halo preparasaun diskute pakote atu avansa iha kongresu nasional dalimak iha fulan-setembru ne’ebé mai, Alkatiri hateten ida-ne’e direitu ema ida-nian.

“Ne’e direitu Lere nian. Ha’u hanoin lahatene saida mak imi (jornalista) hateten sai ha’u hatene  no ha’u la taka dalan ba ema ida maibé estatutu ne’e estatutu buat seluk,” nia hateten.

Entertantu, kongresu nasionál partidu Fretilin ba dalimak ne’e tuir planu sei realiza iha loron 08-10 setembru tinan 2022.

Notísia Relevante: Lideransa Fretilin mandatu 2022-2027 sei hili liuhosi kongresu nasionál

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!