PM Taur: “Ita-nia rekonsiliasaun sai ezemplu ba joven banati tuir’’
DILI, 11 agostu 2022 (TATOLI)—Primeiru-Ministru (PM), Taur Matan Ruak, hateten Timor-Leste nia rekonsiliasaun ho Indonézia sai ezemplu boot iha mundu, nune’e ba joven timoroan iha Timor-Leste presiza banati hodi kria pás no estabilidade, ne’ebé mai hosi interasaun ba malu ho timoroan sira iha Timor Osidentál.
Notísia Relevante: PR Horta: tempu ona hatudu Timor-Leste nia onestidade kona-ba rekonsiliasaun
“Ita-nia rekonsiliasaun ho Indonézia sai ezemplu boot iha mundu. Nune’e ba joven timoroan iha Timor-Leste presiza banati hodi kria pás no estabilidade, ne’ebé mai hosi ita-nia interasaun ba malu ho timoroan sira iha Timor Osidentál. Pás no estabilade mai hosi ita-nia interasaun kooperasaun no ita-nia rekonsiliasaun ne’e, ezemplu boot ida iha mundu, nune’e joven sira presiza banati tuir,” Xefe Governu ne’e hateten ba jornalista sira hafoin ramata enkontru semenál ho Prezidente Repúblika (PR), José Ramos Horta, iha Palásiu Prezidensiál Nicolau Lobato, Bairru Pite, kinta ne’e.
Taur hateten, Timor-Leste iha prinsípiu ida ema-ne’ebé manán tenke jenerozu ba ema-ne’ebé lakon. Timor-Leste jenerozu entaun tenke halibur no Prezidente Repúblika ninia inisiativa atu promove diálogu ho timoroan sira iha Timor Osidentál la’ós buat foun ida.
Ne’ebé, bazea ba polítika Estadu nian ne’ebé hanesan uluk Xanana Gusmão halo no ema hotu halo katak funu hotu ona, mesak timoroan halo oinsa mak hamutuk hodi dezenvolve rai ne’e.
“Ita-boot sira ba Indonézia, sira simu imi halo oinsá. Sira mai fali, imi duni sira ne’e ladi’ak,” Taur hateten.
Foin lala’is PR halo vizita Estadu ba Indonézia hasoru malu mós ho lidér timoroan pro-autonomia sira hanesan Basílio dias de Araújo, Francisco Xavier Lopes da Cruz, Eurico da Costa, no timoroan sira seluk ne’ebé daudaun ne’e hela iha Timor Osidentál, Kupang-Indonézia, hodi hato’o kona-ba dokumentu fraternidade umana relasiona ho situasaun timoroan sira iha Timor Osidentál ne’ebé hakarak fila mai Timor-Leste tuir ida-idak nia konxiénsia rasik.
Nune’e, Xefe Governu ne’e hateten se Timor-Leste ho Indonézia bele halo rekonsiliasaun ba malu tanbasá mak Timoroan ho Timoroan sira labele halo rekonsiliasaun.
“Hanoin inisiativa Prezidente Repúblika nian dentru polítika ne’ebé ita-nia Estadu hili no ha’u kontente loos. Ezemplu ida ba ita hotu liu-liu ba joven sira no ami sira-ne’e tempu la naruk ona maibé imi joven sira mai labele tuku malu fali ne’e, rai kloot ona ba imi. Buat ne’ebé liu ona liu ona no ita haree ba futuru de’it. Ho lian portugés águas passadas não movem moinho ka bee ne’ebé liu ona la dulas no ida ne’ebé mai ne’e mak dulas,” nia dehan.
Notísia Relevante: Konseitu rekonsiliasaun transforma ona iha relatóriu CAVR “Chega!”
Jornalista : Nelson de Sousa
Editór : Cancio Ximenes
