DILI, 12 agostu 2022 (TATOLI)—Prezidente Repúblika (PR), José Ramos Horta, konkorda oinsá buka diálogu no konsesu entre líder nasionál tanba durante ne’e nia parte sempre hasoru malu ho Marí Alkatiri, Primeiru-Ministru taur Matan Ruak no Xanana Gusmão.
Notísia Relevante: PR Horta-Alkatiri hakarak buka konsensu entre lidér nasionál
“Klaru, hanesan ita-boot sira (jornalista) hatene, ha’u hasoru Marí Alkatiri la’ós primeira vés no ha’u sempre hasoru ho Primeiru-Ministru (Taur Matan Ruak) no kontaktu sente ho Maun Boot Xanana Gusmão,” Prezidente repúblika, José Ramos Horta, hateten ba jornalista sira hafoin vizita Kuartél Jerál PNTL Caicoli, Dili, sesta ne’e.
Xefe Estadu ne’e hatutan, bainhira liu tiha kongresu nasionál partidu Frente Revolucionária de Timor-Leste Independente (FRETILIN) nian ne’ebé sei halo iha fulan-setembru ne’e mak ba oin buka hodi halo diálogu.
“Ita haree buka halo diálogu ba oin dezáfiu ne’ebé Timor enfrenta 2023-2027. Purtantu, ida-ne’e bele diálogu normál ida,” nia dehan.
Notísia Relevante: PM Taur apoiu oinsá buka konsensu entre lidér nasionál
Laureadu Nobel da Paz ne’e hanoin, diálogu entre lidér sira haree liu-liu oinsá buka konsensu nasionál hodi rezolve dezáfiu boot rai ida-nian ba oin hodi lori dezenvolvimentu liután.
“Ba ha’u laiha preokupasaun liu kona-ba lidér sira tenke ko’alia maibé Timor la’ós Sudaun do Sul, Myanmar, ita laiha konflitu. Maibé, purtantu, simbolikamente karik tinan lima mai ami ne’ebé jerasaun 1975. Maibé la’ós de’it jerasaun 1975, iha lidér sira seluk tenke halo diálogu hodi halo konsensu nasionál ruma hodi rezolve dezáfiu boot rai ida-ne’e nian, liu-liu iha ita-nia sistema polítika partidaria demokrásia Estadu direitu no ekonomia,” nia hateten.
Tuir Horta, iha ita-nia polítika la’o di’ak ita haree instituisaun internasionál hanesan Freedom House, Economics sira klasifika Timor-Leste (TL) númeru um (1) iha South is Asea no Reporter Without Border iha Bruxelas klasifika TL númeru 17 iha mundu, kompara ho Indonézia 80, Estadu Unidu 40 no Austrália 20-resin.
“Tan ne’e Timor-Leste klasifikasaun aas tebes iha mídia freedom maibé se halo avaliasaun ba ita ekonomia performance ha’u hanoin negativu karik. Entaun, ha’u hanoin ita labele de’it demokrásia di’ak maibé ekonomia ladi’ak, purtantu ne’e mak ita tenke haree tinan sira mai ne’e, ita besik atu tama ASEAN servisu makaas liutá,” nia hateten.
Tanba, Xefe Governu ne’e hateten, ASEAN fó oportunidade boot ba Timor-Leste nia ekonomia atu la’o ba oin.
Notísia Relevante: PR Horta: “Ha’u-nia odomatan loke ba diskusaun buka dalan konsensu nasionál”
Jornalista : Nelson de Sousa
Editór : Cancio Ximenes
