Governu finaliza pagamentu subsídiu idozu no invalidéz iha Suai Loro
COVALIMA, 15 agostu 2022 (TATOLI)–Governu liuhosi Banco Nasionál Komérsiu Timor-Leste (BNCTL sigla-Portugés) finaliza ona pagamentu subsídiu ba idozu no invalidéz iha suku Suai Loro, postu administrativu Suai, munisípiu Covalima.
Notísia Relevante: 2020-2022: INSS rejistu idozu no invalidéz ne’ebé mate hamutuk 2.078
“Pagamentu ba idozu no invalidéz iha suku Suai Loro finaliza ona iha fulan kotuk liubá. Maibé, ami hanesan autoridade lokál la asesu númeru benefisáriu, tuir loloos ami tenke asesu uluk dadus nune’e ami bele hatene númeru idozu no invalidéz iha Suai Loro,” Xefe Suku Suai Loro Martinho Mendoça informa ba Agência Tatoli iha Suai Loro, segunda ne’e.
Bazea ba oráriu pagamentu iha suku Suai Loro, postu administrativu Suai, BNCTL hahú halo pagamentu iha kinta (07/07) tinan 2022 ne’ebé durante halo pagamentu la simu reklamasaun.
Maibé, nia dehan, idozu no invalidéz foun sira-nia naran iha maibé sira-nia konta bank ária mak seidauk iha nune’e nia rezultadu sei hein pagamentu ba faze daruak nian.
Dadus ne’ebé Agência Tatoli asesu hosi Diretór Sentru Solidariedade Sosiál no Inkluzaun Covalima, Agapito Asis, informa idozu no invalidéz iha suku Suai Loro hamutuk na’in-340.
Tuir oráriu pagamentu hosi Banku Nasionál Komérsiu Timor-Leste (Sigla Portugés), pagamentu ba idozu no invalidéz hahú iha suku Suai Loro, postu administrative Suai iha kinta (07 jullu 2022) ne’ebé ramata ona iha 13 fulan-jullu tinan 2022.
Iha postu administrativu Tilomar hahú halo pagamentu iha loron 14 to’o 20 fulan-jullu, postu administrativu Maucatar hahú halo pagamentu iha 21 to’o 26 fulan-jullu, postu administrativu Zumalai halo pagamentu iha 27 jullu to’o 08 fulan-agostu, Fatululik hahú 09-10 fulan-agostu, Fatumea 15-17 agostu no postu administrativu Fohorem hahú halo pagamentu iha loron 22 to’o 25 agostu tinan ne’e.
Notísia Relevante: Governu hahú halo pagamentu ba idozu-invalidéz iha Suai Loro
Jornalista : Celestina Teles
Editór : Cancio Ximenes
