DILI, 16 agostu 2022 (TATOLI)—Membru Parlamentu Nasionál (PN) preokupa ho desizaun primeiru interrogatóriu Tribunál Distritál Dili (TDD) aplika Termu Identidade Rezidénsia (TIR) ba arguidu na’in-sia (9) ne’ebé envolve iha kazu droga.
Notísia Relevante: Laiha faktu sufisiente, TDD aplika TIR ba arguidu nain-sia ba kazu ilísitu droga
“Ha’u preokupa, konforme ha’u lee notísia hateten arguidu sira rasik konfesa sira konsumu ona droga no bainhira prosesu flagante deleitu Tribunál hola desizaun ba liberta fali ema sira-ne’e ho estatutu Termu Identidade Rezidénsia (TIR). Prontu, ne’e desizaun Tribunál nian no sira mak hatene lei no interpreta artigu sira-ne’e hotu. Maibé, nu’udar reprezentante povu ida, ha’u triste uitoan ho desizaun ida-ne’e karik iha intervensaun ruma,” Deputadu CNRT, Patrocínio Fernandes, hateten ba jornalista sira iha Parlamentu Nasionál, tersa ne’e.
Nia husu parte kompetente liu-liu Polísia Sientífika Investigasaun Kriminál (PCIC, siglá protugés), Polísia Nasionál Sientífika Investigasaun Kriminál (PNSIK) no Ministéiru Públiku (MP) tenke sériu tau atensaun ba ida-ne’e hodi haree didi’ak, hotu-hotu servisu hamutuk hodi halo investigasaun kle’an servisu ho profisionál hodi halo prosesu ida transparánsia ba públiku mós bele akompaña prosesu ne’e.
“Ita husu atu prosesu kazu sira-ne’e halo transparánsia liu-liu ba kazu droga sira-ne’e prosesu transparánsia ba povu tomak bele akompaña lae iha arguidu balun ita haree katak polísia kaer dalarua ka dala tolu ona, maibé depois livre nafatin hanoin ema hotu iha lei nia oin hanesan nasaun adota prinsípiu ida-ne’e. Tanba droga ne’e ameasa boot tebes ba joven sira aban bainrua,” deputadu opozisaun ne’e sujere.
Deputada Frente Revolucionária de Timor-Leste Independente (FRETILIN), Lídia Rorberta, mós preokupa kazu droga ne’ebé daudaun ne’e akontese iha rai-laran ne’e bele estraga joven sira-nia futuru.
“Kona-ba kazu droga, ita preokupa bele estraga ita-nia joven sira-nia futuru. Entaun husu parte kompetente atu nune’e ita bele haree kazu sira-ne’e buka rezolve to’o nia hun ba grupu rede sira,” nia fo hanoin.
Deputada membru Komisaun B trata asuntu Negósiu Estranjeiru no Defeza, Seguransa ne’e hateten, komisaun B foin simu relatóriu ida ita tama iha klasifikasaun datoluk lista Amérika nian Timor-Leste sai hanesan zona perigu tanba iha tráfiku droga no tráfiku umanu.
Maibé, nia dehan, situasaun ne’e governasaun daudaun hadi’a agora no iha semana kotuk sira-nia parte simu relatóriu grupu daruak, entaun nia risku ba Timor-Leste la maakas entaun ida-ne’e preokupa tebes hadi’a Timor-Leste nia imajen maibé hadi’a jerasaun foun sira ba oin.
Deputadu UDT, Francisco Xavier, konsidera Tribunál nia desizaun iha primeiru interrogatóriu ne’e, sei iha prosesu investigasaun parte autoridade sira-nian maibé husu presiza kontinua buka investigasaun tanba sira konsumu droga ne’e mai hosi ne’ebé, nune’e investiga kle’an ba sira-ne’ebé halo distribuisaun tanba Timor-Leste lakohi fó impaktu ba joven sira-nia futuru.
Notísia Relevante: Kazu droga, PR Horta husu autoridade prosesa arguidu na’in-sia tuir lei
Jornalista : Nelson de Sousa
Editór : Cancio Ximenes
