DILI,15 agostu 2022 (TATOLI)— Tribunál Distritál Dili (TDD), deside aplika medida koasaun Termu Identidade Rezidénsia (TIR) no aprezentasaun periódika ba arguidu na’in-sia, ne’ebé deskonfia envolve iha kazu ilísitu ba droga.
Tribunál mós aplika medida aprezentasaun periódika ba Arguidu na’in-sia ho inisiál DGS, MM, B, MAA, AY, SSO, M, CRMS no J, katak iha obrigasaun legál atu aprezenta aan fulan-ida dala ida bá iha Polísia Sientífika Investigasaun Kriminál (PCIC).
Notísia relevante:Deskonfia komete aktu ilísitu ba droga, Arguidu na’in-sia submete ba interrogatóriu dahuluk
Razaun, TDD aplika TIR tanba konsidera laiha faktu sufisiente atu lori arguidu sira ba prizaun preventiva, tanba arguidu-sira sai vítima ba konsumu de’it, maibé la’ós distributór.
Maske, iha prosesu alegasaun Ministériu Públiku husu Tribunál atu aplika prizaun preventiva ba arguidu sira tanba konsidera iha indísiu forte katak arguidu sira komete prátika konsumu no transasaun ba droga.
Maibé, parte Defeza husu ba Tribunál atu aplika medida koasaun Termu Identidade Rezidénsia (TIR) ba nia kliente-sira tanba konsidera laiha indísiu forte hodi lori arguidu ba prizaun preventiva.
“Tanba arguidu sira la’ós hanesan ema pesoál ba tráfikante ba droga ou halo distribuisaun ka la’ós ema ne’ebé prodús no importa ka exporta, maibé sira hanesan vitima tanba sira konsumu,” Advogadu privadu, Cancio Freitas ba jornalista sira hafoin ramata julgamentu iha TDD, segunda ne’e.
Tuir nian lei númeru 2/2017, 25 janeiru, kona-ba kombate tráfiku no konsumu ilísitu ba droga. iha artigu 7 kona-ba tráfiku no atividade ilísita no artigu 9 kona-ba agravasaun utilizasun droga fó vantajen bá arguidu sira katak, hafoin medida koasaun ne’e, iha faze investigasaun nia laran maka sei iha klareza arguidu sira iha ligasaun ho se de’it.
Advogadu ne’e dehan medida koasaun TIR no aprezentasaun periódika ne’e sufisiente ona, atu MP loke investigasaun fali no karik identifika sira nia relasaun ho rede tráfikante droga, mak halo fali prosesu ba arguidu sira.
“Bainhira Ministériu Públiku hetan fali indísiu ka faktu sufisiente mak Ministeriu Publiku bele promove ba iha Tribunál atu reativa fali sira nia kazu, maibé Ministériu Públiku la hetan faktu ba kazu ne’e bele arkivu,” nia akresenta.
Audénsia Julgamentu ne’e Prezide hosi juis singular José Gonsalves, Ministériu Públiku reprezenta husi Prokuradór Rogeiro Viegas, Arguidu sira hetan asistensia legál hosi Defesór Públiku Estaqui Guterres, Albino de Jesus Pereira no Advogadu privadu,Arlindo Sanches, Fernando da Costa, Olivio, José Guterres, José Pedro Camões, Sergio, Cancio Freitas, Napolião de Oliveira.
Notísia relevante:Kazu droga, PR Horta husu autoridade prosesa arguidu na’in-sia tuir lei
Jornalista: Natalino Costa
Editór : Florencio Miranda Ximenes