EKONOMIA, HEADLINE

MKAE rekoñese empreza balun fahe produtu Cesta Bázika a’at

MKAE rekoñese empreza balun fahe produtu Cesta Bázika a’at

Ministru Koordenadór Asuntu Ekonómiku, Joaquim Amaral. Imajen Tatoli/Egas Cristóvão

DILI, 16 agostu 2022 (TATOLI)–Ministru Koordenadór Asuntu Ekonómiku (MKAE), Joaquim Amaral, rekoñese, iha duni empreza balun mak fahe produtu programa Cesta Bázika nia a’at ba benefisiáriu sira.

“Hein katak empreza sira kontinua hadi’a tanba dala ruma rai iha armazen ne’ebé ho kondisaun ladún di’ak, entaun to’o fulan-ida nia aspetu ne’e bele muda-an, ne’e situasaun ne’ebé empreza nasionál barak seidauk prienxe kondisaun hanesan fasilidade atu tau hahán ne’e seidauk di’ak, entaun bele afeta ba produtu sira ne’e, tanba sasán sira ne’e tula hosi armazen ba diretamente fahe, ne’ebé iha momentu fahe mak foin hatene,” Ministru Koordenadór hateten iha Palásiu Prezidensiál, Bairru Pité, tersa ne’e.

Notísia relevante: MTKI rejista reklamente 6.512 Cesta Bázika faze daruak hosi suku haat

Maski nune’e, tuir Ministru, empreza sira laiha intensaun hodi fahe sasán a’at ba komunidade, normalmente iha serbisu balun ladi’ak maibé iha vontade atu hadi’a.

Nia nota, situasaun ne’e sempre akontese maibé la’ós ba empreza hotu, iha kazu balun iha item ida ka rua normalmente kuandu hetan husu empreza sira troka.

“Kazu sira hanesan ne’e sempre deteta no momentu sira ne’e Komisaun Antí-Korrupsaun (CAC, sigla portugés) mós akompaña. Konserteza tanba presu ba produtu sira ne’e iha ona lista ne’ebé regula hosi lei, ne’ebé fiar katak empreza sira la’ós foin halo serbisu, sira kleur ona halo serbisu ho Governu, ne’ebé sira hatene ida-ne’e, kuandu sira viola konserteza hetan sansaun,” nia afirma.

Ministru husu ba entidade hotu, liliu mídia atu informa ba autoridade relevante karik hetan sidadaun balun ne’ebé ho rendimentu a’as liu $500 maibé simu Cesta Bazika.

“Lei ne’e lei, ita-nia pozisaun labele a’as liu lei, tanba ne’e mak husu ba entidade hotu atu serbisu hamutuk hodi ajuda mós programa Cesta Bázika bele la’o ho di’ak, husu liliu ba mídia sira atu informa ba parte relevante hanesan CAC, katak sidadaun ne’ebé ho rendimentu liu $500 labele simu Cesta Bazika, tanba sira ne’e lei la permite atu sira simu,” nia informa.

Jornalista   : Antónia Gusmão

Editora         : Julia Chatarina

iklan
iklan

Leave a Reply

iklan
error: Content is protected !!