iklan

DILI, POLÍTIKA

PR Horta-NU NTT diskute kona-ba umanidade-toleránsia-rekonsiliasaun

PR Horta-NU NTT diskute kona-ba umanidade-toleránsia-rekonsiliasaun

Delegasaun Nahdatul Ulama (NU) Nusa Tenggara Timur (NTT)-Indonézia ne’ebé lidera hosi Ibrahin Arif, hala’o enkontru ho Prezidente Repúblika, José Ramos Horta, iha Palásiu Prezidensiál Nicolau Lobato, Bairru Pite, kuarta (17/08). Imajen.Mídia PR.

DILI, 17 agostu 2022 (TATOLI)—Prezidente Repúblika (PR), José Ramos Horta, kuarta ne’e, simu audiénsia ho Diretór Nahdatul Ulama (NU) Nusa Tenggara Timur (NTT)-Indonézia, Ibrahin Arif, ho delegasaun hodi hakle’an diskusaun kona-ba umanidade, toleránsia no rekonsiliasaun tuir dokumentu fraternidade umana.

Notísia Relevante: PR Horta: tempu ona hatudu Timor-Leste nia onestidade kona-ba rekonsiliasaun 

“Oportunidade di’ak tebes mai ami hodi hasoru malu ho Prezidente Timor-Leste. Ami-nia objetivu hodi mai hasoru malu ho Prezidente TL tanba iha fulan jullu liubá Prezidente Republika, Ramos Horta, mós halo ona vizita ba ami-nia fatin iha NTT. NU tau atensaun makaas ba direitu umanu, toleránsia relijiaun no direitu hanesan ba ema hotu. Ami-nia ideia ne’e relevante tebes ho ideia hosi Prezidente Ramos Horta nian,” Diretór Nahdatul Ulama (NU) Nusa Tenggara Timur (NTT)-Indonézia, Ibrahin Arif, hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite.

Nia hatutan, ekipa nia prezensa iha ne’e lori Konsellu Dirasaun NU provínsia NTT nian hodi introdús kona-ba rezultadu hosi vizita PR Horta ba Jakarta no mós ajenda sira seluk ne’ebé sira-nia parte aprezenta ba Xefe Estadu.

Iha sorumutu ne’e ko’alia mós kona-ba posibilidade atu harii ramu NU nian iha Timor-Leste, tanba NU hanesan organizasaun musulmanu ne’ebé estabelese ona kooperasaun iha nasaun 74, tanba ne’e sira-nia parte hakarak TL sai parseiru ba nasaun 75.

Aleinde ne’e, iha asuntu barak ne’ebé ekipa aprezenta ba PR mak oinsá atu estabelese kooperasaun iha komérsiu no mós asuntu sira kona-ba umanitária nian, atu nune’e bele fó benefísiu ba rai rua.

NU tau atensaun makaas ba direitu umanu, toleránsia relijiaun no direitu hanesan ba ema hotu.

“Ami-nia ideia ne’e relevante tebes ho ideia hosi Presidente Repúblika nian no PR apresia ami-nia vizita no ami esforsu hodi atualiza ajenda sira-ne’ebé relasiona ho umanidade no toleránsia. Ida-ne’e sai hanesan ami-nia konseitu ne’ebé sei informa fali ba ami-nia superiór sira iha Jakarta,” nia hateten.

Ibrahin Arif, apresia no sente onradu tanba sira-nia vizita iha TL ne’e simu ho di’ak tebes, liu-liu hosi Prezidente Republika, José Ramos Horta.

Iha fatin hanesan, Vise Konsellu Nasionál Islámiku Timor-Leste, Abdullah Inacio António Soares, hateten nia-parte akompaña NU NTT hodi hasoru malu ho PR ko’alia mós koa-ba promove fraternidade umana.

“Ami akompaña baniaka hosi NTT-Kupang  ne’ebé hanesan programa vizita Prezidente Repúblika ba Indonézia atu promove fraternidade umana sai hanesan exemplar ba mundu tomak liu-liu ba nasaun viziñu Indonézia,” nia dehan.

Notísia Relevante: PM Taur: “Ita-nia rekonsiliasaun sai ezemplu ba joven banati tuir’’

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!