VIQUEQUE, 18 agostu 2022 (TATOLI)-–Autoridade Nasionál Petróleu no Minerál (ANPM), kinta ne’e, lansa projetu ortikultura hodi oferese fundu hosi empreza Carnarvon Petroleum Ltd ba grupu haat iha suku Maluro, postu administrativu Viqueque vila, munisípiu Viqueque.
“Objetivu lansamentu projetu ne’e atu ita implementa kompromisu lokál hosi empreza Carnarvon ne’ebé hetan ita-nia bloku iha kampu Bufalo, ne’ebé empreza halo perfurasaun iha tinan kotuk maibé la hetan mina, nune’e sira sai tiha maibé nafatin implementa kompromisu lokál,” Prezidente ANPM, Florentino Soares Ferreira, informa iha suku Maloro.
Notísia relevante: Empreza CARNARVON hahú perfurasaun posu Buffalo iha fulan ne’e
Empreza ne’e apoiu fundu hamutuk $100.000 no identifika grupu ualu seluk iha kosta súl.
“Ohin ami mai fó apoiu orsamentu ba grupu haat iha suku Maluro hodi halo atividade ortikultura. Dalabarak ema ko’alia Beaço hanesan parte integradu hosi projetu tasi mane no kosta sul, tanba ne’e presiza fó apoia ba komunidade,” nia akresenta.
Grupu haat ne’ebé hetan fundu maka hanesan Buka Rasik, Haburas Hamutuk, Moris Hamutuk no Haburas Rai.
Nune’e, ANPM no empreza Carnarvon Petroleum Ltd fó apoiu $18.000 ba benefisiáriu iha suku Maluro, ne’ebé kada grupu hetan $5.000 no balun $4.000 tuir proposta ne’ebé sira submete.
Iha fatin hanesan, Xefe suku Maluro, Francisco Amaral, apresia ho inisiativa hodi hakbiit grupu agrikultura hodi reforsa atividade ortikultura.
“Ha’u agradese ba ANPM bele apoiu fundu hodi tulun ami-nia grupu agrikutura sira-nia atividade ortikultura. Tanba liuhosi apoiu ne’e ita bele enkoraja komunidade serbisu badinas hodi hasa’e produtividade,” nia tenik.
Responsável Grupu Buka Rasik, Gregório Soares, haktuir, iha inísiu grupu ne’e hala’o ona atividade ortikultura kuda modo, kanku, repollu, brijela no tomante hodi fa’an iha merkadu.
“Ha’u sente apoiu ne’ebé ami hetan hodi bele reforsa liu tan ami-nia atividade tanba hosi fundu ne’e ami sei sosa ekipamentu traktór kiik, sanyo no seluk tan. Ba oin ami sei hasa’e produsaun hodi fa’an iha merkadu sira,” nia dehan.
Grupu Buka Rasik daudaun ho membru hamutuk 15 no grupu ne’e okupa rai kuaze ektare ida iha suku Maluro.
Atividade lansamentu programa ne’e partisipa hosi Autoridade lokál no grupu ortikultura lokál sira.
Jornalista : Vitorno Lopes da Costa
Editora : Julia Chatarina
