Fila hosi Roma, Xanana vizita Indonézia diskute prosesu fronteira terrestre

DILI, 18 agostu 2022 (TATOLI)—Prezidente Repúblika (PR), José Ramos Horta, kinta ne’e, hala’o audénsia ho líder nasionál no atuál Xefe Negosiadór Prinsipál Delimitasaun Fronteira Terrestre, Xanana Gusmão, hodi ko’alia kona-ba diskusaun ba negosiasaun prosesu fronteira terrestre entre Timor-Leste no Indonézia ne’ebé disputa hela.
Notísia Relevante: Xanana sei ba Indonézia halo diskusaun prosesu fronteira terrestre iha agostu
Eis Primeiru-Ministru, Xanana Gusmão, hateten hafoin dezloka ba Roma-Italia no hafoin fila hosi Roma, nia parte sei hala’o vizita ba Jakarta-Indonézia hodi kontinua hasoru malu ho Governu Indonézia atu kontinua halo diskusaun ba prosesu negosiasaun fronteira terrestre.
“Depois fila hosi Roma ha’u ba liu Jakarta atu komesa ona haree bainhira loos no oinsá ita iha fronteira rua. Ne’ebé, ha’u fila hosi Roma, ba fali Jakarta atu hasoru Ministru sira iha Indonézia nian, tanba ne’e ohin ami ko’alia uituan kona-ba fronteira terrestre,” Xanana Gusmão hateten ba jornalista sira hafoin ramata enkontru ho Xefe Estadu, José Ramos Horta, iha Palásiu Prezidensiál Nicolau Lobato, Bairru Pite, kinta ne’e.
Iha bibán ne’e, Prezidente Repúblika husu hodi hatene progresu negosiasaun kona-ba fronteitra terrestre ne’e to’o iha ne’ebé ona no husu atu haree fila kestaun negosiasaun frenteira terrestre ho Idonézia ne’e.
Notísia Relevante: TL ho Indonézia finaliza delimitasaun fronteira terrestre iha tinan ne’e
“Prezidente Repúblika foin daudaun vizita ba iha Indonézia, husu mós haree fila-fali tanba COVID-19 kuaze tinan tolu ona la ko’alia kona-ba fronteira no laiha kontinuasaun ba asuntu ne’e, tanba ne’e depois PR fila fó hatene mai ami atu bele kontinua,” Xanana Gusmão hateten.
Prezidente Repúblika, José Ramos Horta, nomea enviadu espesiál Xanana Gusmão ne’ebé reprezentante hanesan Xefe Estadu nian hodi partisipa serimónia investidura Kardeál, Don Virgílio do Carmo, iha loron 27 agostu tinan ne’e iha Vátikanu, Roma.
Enkuantu, durante sorumutu ne’e Xefe Estadu mós partilla nia vizita Estadu ba iha Indonézia foin lalais ne’e.
“Ami ko’alia mós rezultadu Prezidente Repúblika hala’o vizita Estadu ba Indonézia hodi hasoru malu ho Prezidente Repúblika Indonézia, Joko Widodo, ne’ebé ko’alia asuntu lubuki ida,” Xanana dehan
Notísia Relevante: PR Horta: vizita Estadu kontinua hametin relasaun bilaterál TL-Indonézia
Jornalista : Nelson de Sousa
Editór : Cancio Ximenes

