EDUKASAUN, KAPITÁL

Governu fó formasaun prátika kuda budu tasi ba komuniade Metinaro

Governu fó formasaun prátika kuda budu tasi ba komuniade Metinaro

Maneira kuda budu tasi iha tasi laran. Imajen/Espesiál.

DILI, 18 agostu 2022 (TATOLI)—Governu liuhosi Dirasaun Servisu Agrikultura Munisípiu Dili iha tinan ne’e koopera hamutuk ho Departamentu Reprezentante Territóriál Peska hodi fó formasaun no prátika ba komunidade, kuda budu tasi iha suku Sabuli no Wenunuk iha postu administrativu Metinaro, munisípiu Dili.

“Atividade kuda budu tasi ne’e, hosi reprezentasaun territórial peska ne’ebé mak koloka iha munisípiu hodi servisu hamutuk ho tékniku Dirasaun Servisu Agrikultura Munisípiu Dili, liu-liu ba tékniku peska nian ne’ebé mak sira halo hela formasaun no prátika. Tanba, formasaun no prátika ne’e ba komunidade oinsá kuda budu tasi. Tanba ne’e mak iha fulan ne’e nia laran hahú ona kolleta budu tasi iha Metinaro,” Diretór Servisu Agrikultura Munisípiu Dili, Teofilo Maia, hateten ba Agência Tatoli, iha nia kna’ar fatin, Dili, kinta ne’e.

Tuir nia, atividade kuda budu tasi ne’e hahú ona iha tempu Indonézia molok 1999 komunidade iha Metinaro kuda ona, maibé atividade ne’e la kontinua tanba ne’e foin hahú fali iha fulan ida liubá hodi fó prátika ba komunidade kuda budu tasi.

“Iha ne’e ita-nia komunidade mós fó rekomendasaun katak ba futuru tenke kontinua habelar no habelar beibeik, tanba atividade ne’e bele hadi’a sira-nia rendimentu uma kain nian,” nia esplika.

Atividade kuda budu tasi ne’e komunidade sira iha grupu haat (4) ho pesoál hamutuk 32, iha postu administrativu Metinaro.

“Iha atividade ne’e, ita-nia komunidade kuda ne’e hamutuk 32, sira kuda budu tasi ne’e, hanesan budu tasi nia kain iha ona, oinsá ita dezenvolve fali iha tasi laran,” nia dehan.

Maske nune’e, prosesu kuda ne’e dahuluk fó formasaun no hafoin prepara matéria ba komunidade hodi halo prátika.

“Matéria mak budu tasi ne’e kesi liu iha tali, depois tali ne’e ba to’o iha tasi laran metru 50 ka 100 hanesan ne’e. Depois ita tau tali dada iha tasi laran labele namkore no dala ruma tara de’it iha tali ne’ebé tara iha tasi laran, Depois budu tasi sira moris rasik iha tasi laran, bainhira kolleta hein uza de’it. Tanba ida-ne’e eskala de’it, ita hanesan amostra de’it iha fatin ne’e, depois ida ne’e temporariamente grupu sira-ne’ebé kuda ne’e bele konsumu iha uma kain no liu uitoan komunidade ka vizinu sira bele sosa fali,” nia dehan.

Tanba budu tasi ne’e, kuandu nia matak faan kilograma ida (1) centavu 50, maibé bainhira halo maran, kilograma ida (1) ne’e $1-resin.

Administrador Postu Administrativu Metinaro, Julio Norberto, hateten atividade kuda budu tasi ne’e, komunidade hahú kuda fulan rua ona hosi junu to’o jullu, hosi ne’e haree kooperasaun di’ak tebes iha atividade ne’e.

“Tanba, atividade kuda ne’e hala’o hafoin sira fó formasaun ba ita-nia ema sira ne’ebé atu kuda ne’e. Tanba ne’e, agora faze ida atu tama ba sira halo kolleta ba budu tasi,” nia informa.

Tuir nia, atividade kuda budu tasi ne’e bele fó tan produsaun kapaas ba komunidade tanba tinan uluk indonézia nian haree esperiénsia ne’ebé iha bele prodús buat barak no fó mós rendimentu ba familia.

Tanba ne’e, atividade kuda budu tasi ne’e ba futuru tenke kontinua, nune’e komunidade bele sente kontente, tanba sira hetan informasaun no hetan mós rendimentu.

Jornalista : Nelia Fernandes

Editór       : Cancio Ximenes

iklan
iklan

Leave a Reply

iklan
error: Content is protected !!