Kestaun justisa, PM Taur laiha komentáriu ba kazu droga

DILI, 18 agostu 2022 (TATOLI)—Primeiru-Ministru (PM), Taur Matan Ruak, hateten kestaun justisa nian ne’e nia parte laiha komentáriu ba desizaun primeiru interrogatórriu Tribunál Distritál Dili (TDD) ne’ebé aplika Termu Identidade Rezidénsia (TIR) ba arguidu na’in-sia (9) iha kazu droga.
Notísia Relevante: Kazu droga, PR Horta husu autoridade prosesa arguidu na’in-sia tuir lei
“Ne’e kestaun justisa nian ha’u laiha komentáriu ida,” PM Taur hateten hodi hatán ba jornalista sira hafoin enkontru semenál ho Prezidente Repúblika (PR), José Ramos Horta, iha Palásiu Prezidensiál Nicolau Lobato Bairru Pite, kinta ne’e.
Xefe Governu ne’e hateten, prosesu ne’e Timor-Leste iha nia lei ne’ebé parte autoridade sira tutela mak bele hala’o servisu no ko’alia.
“Ha’u hanoin implementadór ita iha Ministéiru Públiku, PCIC, PNSIK, Tribunál sira-nia servisu maibé sira mak só bele ko’alia agora ita públiku interpreta de’it ita-nia opiniaun”, nia hateten.
Enkuantu iha loron 15 fulan-agostu 2022 Tribunál Distritál Dili (TDD) deside aplika medida koasaun Termu Identidade Rezidénsia (TIR) no aprezentasaun periódika ba arguidu na’in-sia, ne’ebé deskonfia envolve iha kazu ilísitu ba droga.
Tribunál mós aplika medida aprezentasaun periódika ba arguidu na’in-sia ho inisiál DGS, MM, B, MAA, AY, SSO, M, CRMS no J, katak iha obrigasaun legál atu aprezenta aan fulan-ida dala ida ba iha Polísia Sientífika Investigasaun Kriminál (PCIC, sigla portugés).
Razaun, TDD aplika TIR tanba konsidera laiha faktu sufisiente atu lori arguidu sira ba prizaun preventiva, tanba arguidu-sira sai vítima ba konsumu de’it maibé la’ós distributór.
Maske iha prosesu alegasaun Ministériu Públiku husu Tribunál atu aplika prizaun preventiva ba arguidu sira tanba konsidera iha indísiu forte katak arguidu sira komete prátika konsumu no tranzasaun ba droga.
Maibé, parte Defeza husu ba Tribunál atu aplika medida koasaun Termu Identidade Rezidénsia (TIR) ba nia kliente-sira tanba konsidera laiha indísiu forte hodi lori arguidu ba prizaun preventiva.
“Tanba arguidu sira la’ós hanesan pesoál ba trafikante ba droga ka halo distribuisaun ka la’ós ema ne’ebé prodús no importa ka esporta, maibé sira hanesan vitima tanba sira konsumu,” Advogadu privadu, Cancio Freitas ba jornalista sira hafoin julgamentu iha TDD, segunda ne’e.
Tuir nian lei númeru 2/2017, 25 janeiru, kona-ba kombate tráfiku no konsumu ilísitu ba droga. iha artigu 7 kona-ba tráfiku no atividade ilísita no artigu 9 kona-ba agravasaun utilizasun droga fó vantajen ba arguidu sira katak, hafoin medida koasaun ne’e, iha faze investigasaun nia laran maka sei iha klareza arguidu sira iha ligasaun ho sé de’it.
Advogadu ne’e dehan medida koasaun TIR no aprezentasaun periódika ne’e sufisiente ona, atu MP loke investigasaun fali no karik identifika sira nia relasaun ho rede tráfikante droga, mak halo fali prosesu ba arguidu sira.
“Bainhira Ministériu Públiku hetan fali indísiu ka faktu sufisiente mak Ministeriu Publiku bele promove ba iha Tribunál atu reativa fali sira nia kazu, maibé Ministériu Públiku la hetan faktu ba kazu ne’e bele arkivu,” nia akresenta.
Julgamentu ne’e prezide hosi juiz José Gonçalves, Ministériu Públiku reprezenta hosi Prokuradór Rogeiro Viegas, arguidu sira hetan asisténsia legál hosi Defensór Públiku Estaqui Guterres, Albino de Jesus Pereira no advogadu privadu, Arlindo Sanches, Fernando da Costa, Olivio, José Guterres, José Pedro Camões, Sergio, Cancio Freitas, Napoleão de Oliveira.
Notísia Relevante: Kazu droga, membru PN preokupa TDD aplika TIR ba arguidu na’in-sia
Jornalista : Nelson de Sousa
Editór : Cancio Ximenes

