DILI, 22 agostu 2022 (TATOLI)—Arsebispu Arkidioseze Metropolitana Dili no Kardeál Eleitu, Don Virgílio do Carmo da Silva, SDB, segunda ne’e, arranka ba iha Vatikanu-Roma hodi simu bensaun hosi Santo Padre Francisco sai kardeál dahuluk Timor-Leste nian.
Notísia Relevante: Misa agradesimentu nomeasaun kardeál dahuluk Timor-nian sei realiza iha 06 setembru
Kardeál eleitu ne’e to’o iha aeroporto Comoro iha tuku 12h00, ne’ebé akompanãdu hosi padre, madre no sarani sira ne’e, sasemo (vou) ho aviaun Citilink ho rute Timor-Leste ba Bali no hafoin ne’e kontinua vou ba Vatikanu-Roma.
“Hanesan ema hotu hatene kona-ba novidade ba eventu ida-ne’e, tanba konsistóriu hala’o iha loron 27 agostu. Tanba ne’e mak ohin ha’u aranka ba iha Vatikanu, Roma,” Don Virgílio do Carmo da Silva, hateten ba jornalista sira iha Aeroporto Internacional Prezidente Nicolau Lobato, Comoro, Dili.
Tuir ajenda, iha loron 25 agostu ne’e, sei vizita seminarista timoroan sira iha Roma no iha loron 29 agostu deskansa uitoan hodi prepara an ba serimónia konsistóriu iha Vatikanu.
“Iha loron 29 no 30 agostu, Santu Padre Francisco sei halo enkontru ho Kardeál foun no tuan sira,” Nailulik Salesiano ne’e hateten.
Bainhira enkontru ho Papa Francisco ramata, sei tuir tan fila-fali enkontru ida entre Kardeál sira hosi ASEAN iha loron 30 agostu lorokraik.
Kardeál eleitu ne’e hateten, iha 31 agostu sei halo misa enseramentu ba timoroan sira hotu iha Roma no sei fila-fali mai iha Timor-Leste.
Notísia Relevante: Papa Francisco sei hala’o enkontru ho Xanana Gusmão iha 25 agostu
Jornalista : Domingos Piedade Freitas
Editór : Cancio Ximenes
