Top

Aviaun ne’ebé transporta Xanana Gusmão aterra ona iha Roma

Enviadu Espesiál Extraordináriu Prezidente Repúlika, José Ramos Horta nian, líder istóriku Kay Rala Xanana Gusmão, tersa ne’e, iha tuku 01h38, aterra (mendarat) ona iha aeroportu Internasionál Leandro da Vinci Roma-Itália. Imajen/Mídia PR.

DILI, 23 agostu 2022 (TATOLI)—Enviadu Espesiál Extraordináriu Prezidente Repúlika, José Ramos Horta nian, líder istóriku Kay Rala Xanana Gusmão, hosi Dubai ho aviaun emirates ho númeru voo EK0087, tersa ne’e, iha tuku 01h38, aterra (mendarat) ona iha aeroportu Internasionál Leandro da Vinci Roma-Itália.

Notísia Relevante: Papa Francisco sei hala’o enkontru ho Xanana Gusmão iha 25 agostu

Tuir komunikadu ne’ebé Agência TATOLI asesu hosi Palásiu Prezidensiál Nicolau Lobato ne’e haktuir, Xanana Gusmáo akompañadu hosi Asesor Polítiku Prezidente Repúblika, Tomas do Rasário Cabral no Eis-Embaixador, Roberto Soares, simu direta hosi Embaixadora Timor-Leste ba Vatikanu, Juvita Rodriguês Ataide Gonçalves, hodi entrega kedas aifunan fresku ba líder istóriku ne’e nu’udar sinál agradesimentu ba vizita servisu ne’e.

Hafoin ida-ne’e, Embaixadora lori kedas Enviadu Espesiál Xefe Estadu ne’e ba salaun VIP hodi deskansa minutu balun hodi atualiza informasaun kona-ba programa vizita sei hala’o tuir ajenda ne’ebé ekipa prepara hamutuk ho Santa Sé, hodi hasoru Amu Papa Fransisco iha Basilika São Pedro Vatikanu.

Arsebispu Arquidioseze Metropolitana Díli, Dom Virgílio do Carmo da Silva dezloka hosi Dili iha loron segunda (22/08) ne’e no iha loron 23 agostu sei to’o iha Roma, sei simu direta hosi protokolu Santa Sé no embaixadora Juvita Rodriguês.

Bispu Virgílio doa Carmo da Silva, SDB, hamutuk ho bispu na’in-20 sira seluk sei hela hamutuk iha fatin bispu sira-nian ne’ebé Vatikanu prepara ona.

Iha loron 27 agostu mak Papa Fransisco sei hala’o serimónia investidura ba kardeál na’in-21 inklui bispu Dili ne’ebé sei hetan investidura kompostu hosi kardeál foun na’in-ualu (8) hosi Europa, neen (6) hosi Ázia, rua (2) hosi Áfrika, ida (1) hosi Amérika Norte, haat (4) hosi Amérika Sentrál no Latina Amérika nian.

Entertantu, tuir ajenda Xanana Gusmão reprezenta Xefe Estadu iha loron 25 agostu ne’e sei hasoru malu uluk hodi halo enkontru ho Papa Francisco, hafoin ne’e iha 27 agostu sei partisipa serimónia investidura Bispu Don Virgílio do Carmo da Silva, SDB, ba Kardeál.

Notísia Relevante: Ohin, kardeál eleitu Don Virgílio arranka bá Vatikanu

Jornalista : Nelson de Sousa

Editór        : Cancio Ximenes

Publisidade

Leave a Reply

Latest Post

error: Content is protected !!