DILI, 24 agostu 2022 (TATOLI)—Xefe Departamentu Forensik iha Hospitál Nasionál Guido Valadares (HNGV), Nilton Tilman, informa ekipa Forensik finaliza ona prosesu autopsia ba mate-isin, Padre Abito José Brites Casimiro no entrega ona ba família atu halo seremónia funebre.
Iha segunda (22/08), Ekipa FORENSIK simu mate-isin Padre Abeto Brites atu autopsia hafoin família konkorda no simu mós mandadu hosi Polísia Siéntifika Investigasaun Kriminál (PICC,sigla Portugés) atubele hatene kronolójia hosi akontesimentu ne’e.
Notísia relevante: Família konkorda halo autopsia ba Pe. Abito José Brinia mate-isin
“Prosesu autopsia ba mate-isin Padre (Abeto Brites) ne’e parte médiku Forensik iha HNGV halo iha loron 23 agostu 2022 no dadeer ne’e, finaliza ona hodi entrega mate-isin ba familia hodi halo seremónia funebre,” katak Doutór Nilton Tilman ba Agência TATOLI, via telefónika, kuarta ne’e.
Daudaun ne’e, Responsavél ne’e dehan ekipa Forensik HNGV hahú halo elaborasaun ba rezultadu autopsia, hodi entrega ba PICC atu analiza ba rezultadu autopsia ne’e.
Notísia relevante: PNTL kontinua buka sasin ba Padre Abito Brites nia-mate
“Agora ita hein, tanba sei iha hela prosesu forma no finalizasaun relatóriu autopsia no sei entrega ba parte kompetente sira mak bele fó sai rezultadu outopsia,” Doutór Tilman akresenta.
Entretantu, Jornalista Agência TATOLI konfirma ho parte Polisia Siéntifika Investigasaun Kriminál (PCIC,sigla Portugés), maibé rezeita fó informasaun klaru kona-ba rezultadu autopsia ba matébian Padre Abito José Britis Casimiro tanba konsidera segredu justisa.
Notísia relevante: Asidente iha Dare, Maromak bolu hikas Pe. Abito José Brites
Jornalista : Nelia Fernandes
Editór : Florencio Miranda Ximenes
