Top

Kardeál eleitu Don Virgílio no delegasaun PN to’o ona iha Roma

Arsebispu Arkidioseze Metropolitana Dili, Don Virgílio do Carmo da Silva, akompañadu hosi Pe. Ivo Martins da Silva no delegasaun hosi Parlamentu Nasionál (PN), kuarta ne’e, iha tuku 01h25 to’o iha aeroportu Internasionál Leonardo da Vinci.

DILI, 24 agostu 2022 (TATOLI)—Arsebispu Arkidioseze Metropolitana Dili, Don Virgílio do Carmo da Silva, SDB, akompañadu hosi Pe. Ivo Martins da Silva no delegasaun hosi Parlamentu Nasionál (PN), kuarta ne’e, tuku 01h25, to’o ona iha aeroportu Internsionál Leonardo da Vinci Roma-Vatikanu.

Notísia Relevante: Governu prevee $220.732 realiza resesaun elevasaun Dom Virgílio hanesan Kardeál 

“Amu Bispu ho delegasaun hosi órgaun lejislativu hamutuk na’in-haat ne’ebé xefia hosi Vise Prezidente Parlamentu Nasionál, Maria Angelina Sarmento, akompãnadu mós Vise Prezidente PN, Luís Roberto, ne’e simu direta hosi ekipa protokolu  komunidade Timoroan iha Itália (COMTIL) no Embaixadora Timor-Leste ba Vatikanu, Juvita Rodrigues Ataide Gonçalves,” refere komunikadu imprensa ne’ebé Agência TATOLI asesu hosi mídia Palásiu Prezidente Repúblika, kuarta ne’e.

Embaixadora Timor-Leste ba Vatikanu, Juvita Rodrigues, hato’o benvindu bá Arsebispu Arkidioseze Metropolina Dili ne’ebé hala’o viajen hamutuk ho delegasaun Parlamentu Nasionál.

“Bem-Vindu no orgullu ami Embaixada hamutuk ho komunidade Timoroan sira bele simu Amu Bispu hamutuk ho deputadu sira hodi hala’o viajen hosi Timor-Leste to’o mai Itália, hodi hein prosesu investidura ba ita-nia amu Bispu nu’udar Kardeál dahuluk ba Timor-Leste hamutuk ho Bispu no nailulik sira hosi nasaun seluk,” Embaixadora Juvita hateten.

Reprezentante Madre Kongregasaun SSpS, Joana Soares hamutuk ho komunidade Timoroan sira sente orgullu, tanba bele halo preparasaun hodi simu Bispu Don Virgilio ho delegasaun ho atividade simples tara tais no entrega aifunan fresku.

“Ami reprezenta Timoroan tomak organiza hamutuk ho ita-nia Embaixadora ho orgullu hodi reprezenta Timoroan tomak ne’ebé hela iha Europa liu-liu iha Italia, ho domin boot hato’o ami-nia bem-vindu ba Amu Bispu tanba agora ami sente la mesak, agora mai hamutuk ho ita iha Itália,” Madre Joana haktuir.

Arsebispu Arkedioseze Metropolitana Dili, Don Virgílio do Carmo da Silva mós hato’o agradesimrntu ba preparasaun hosi Embaixada Timor-Leste iha Vátikanu hamutuk ho Timoroan sira hodi simu nia viajen iha aeroportu.

“Ha’u agradese ba imi-nia preparasaun tomak hodi simu viajen ida-ne’e. Ha’u hato’o de’it ba ita hotu hato’o agradese ba Nai Maromak nia planu furak sira ba ita-nia rain Timor-Leste,” nia hateten.

Hosi aeroportu, ekipa akompaña Arsebispu Arkidioseze Metropolitana Dili, Don Virgílio do Carmo da Silva kontinua ba hela iha rezidénsia Casa de Santa Marta iha Vatikanu.

Don Virgílio sei simu investidura hosi Papa Fransisco sai Kardeál dahuluk ba Timor-Leste iha loron 27 fulan Agostu 2022, nu’udar prezente furak ida hosi Papa Fransisco hodi fó orgullu povu Timor-Leste ne’ebé maioria nu’udar sarani Katolika iha rejiaun ASEAN.

Bispu Don Virgílio sei hela hamutuk ho bispu na’in-20 seluk kompostu hosi kandidatu kardeál foun na’in-ualu (8) hosi Europa, neen (6) hosi Ázia, rua (2) hosi Áfrika, ida (1) hosi Amérika Norte, haat (4) hosi Amérika Sentrál no Latina Amérika nian sei hela hamutuk hodi prepara hamutuk serimonia kriasaun ba sai kardiál foun hosi Amu Papa Papa Francisco iha Basilika São Pedro Vatikanu.

Notísia Relevante: Ohin, kardeál eleitu Don Virgílio arranka bá Vatikanu

Jornalista : Nelson de Sousa

Editór        : Cancio Ximenes

Publisidade

Leave a Reply

Latest Post

error: Content is protected !!