Bobonaro sei selebra loron konsulta populár ho misa agradesimentu no kari ai-funan
BOBONARO, 25 agostu 2022 (TATOLI)-Autoridade Munisípiu Bobonaro (AMB) sei selebra loron konsulta populár 30 agostu ba dala-XXIII ho misa agradesimentu no kari ai-funan ba mártir sira.
Prezidente Autoridade Munisípiu Bobonaro, Ernesto de Oliveira Barreto, informa asuntu ne’e hafoin halo enkontru preparasaun 30 agostu ho liña ministeriál, liña setoriál sira hotu no Polísia Nasionál Timor-Leste (PNTL), ne’ebé realiza iha salaun administrasaun munisípál Bobonaro, kinta ne’e.
Notísia relevante: AMB husu komunidade dada Bandeira RDTL iha uma-oin selebra 30 agostu
“Ohin, ami enkontru ba preparasaun loron konsulta populár 30 agostu ne’ebé loke naroman ba Timor-Leste, ita iha osan natoon de’it maizumenus mill dolar hodi selebra loron ne’e ho atividade misa agradesimentu, kari-aifunan iha Osoáriu no ikus liu kari ai-funan iha Raso Batugade,” nia informa ba Jornalista sira.
Atividade misa agradesimentu ne’e sei hala’o iha Igereja Parókia Santa-Cruz Maliana, ne’ebé sei partisipa hosi funsionáriu liña ministeriál, liña setoriál no komunidade sira.
Hafoin misa, funsionáriu sira hotu sei ba tau ai-fuan iha Osoariu suku Odomau, postu administrativu hodi presta omenajen ba mártir 578 ne’ebé mate hahú hosi tinan 1975 to’o 1999.
Hafoin hakat ba Batugade, suku Sanirin, postu administrativu Balibo, hodi kari-ai-funan ba saudozu sira-ne’ebé durante tempu okupasaun ilegál Indonézia halo asaun oho soe tasi laran Batugade nian.
“Kari ai-funan ba tasi ne’e atu fó satizfasaun de’it ba mártir sira-nia família, ne’ebé mak lakon la’en, lakon oan, lakon aman, avo, nune’e valoriza sira-nia sakrifísiu tanba ne’e mak kari ai-funan iha tasi,” nia hateten.
PAM Bobonaro ne’e fó ona orientasaun ba diretór sira hotu atu mobiliza funsionáriu sira obrigatoriumente partisipa iha misa agradesimentu nu’udar símbolu valorizasaun ba eroi no eroina sira.
Enkuantu autoridade munisipál mós hatún ona karta orientasaun ba administradór postu administrativu neen, aviza ba komunidade sira iha suku 50, aldeia 193, atu dada sa’e bandeira (RDTL) iha idak-idak nia uma-oin.
Nia apela ba komunidade sira tenke kuda sentidu nasionalizmu no patriotizmu nune’e bele iha konsiénsia dada sa’e bandeira.
“Ita tenke obrigatóriu hasa’e Bandeira, tanba saida ita baruk hasa’e Bandeira. Uluk Bandeira Merah Putih ita badinas loos, ita ukun-an ona. Lolos ne’e la presiza orientasaun, ita rona loron boot ne’e na’in hasae de’it ona,” nia afirma.
Entretantu falta de’it loron lima ona Timor-Leste sei komemora loron konsulta populár 30 agostu ba dala-XXIII ho tema “Ho espíritu kosulta populár 30 agostu 1999, mai ita hametin pás no estabilidade ba dezenvolvimentu iha ita-nia rai Timor-Leste”.
Maibe tuir observasaun Agência Tatoli iha kapitál Maliana hanesan kapitál munisípiu Bobonaro komunidade sira maioria seidauk dada sa’e Bandeira RDTL iha idak-idak nia uma-oin.
Notísia relevante: Governu selebra loron Konsulta Populár ho marsa saudavél-atividade desportiva
Jornalista: Sérgio da Cruz
Editór: Evaristo Soares Martins
