DILI, 24 agostu 2022 (TATOLI)—Koordenadór Komisaun Loron Konsulta Populár, Elizeu Ângelo da Costa Soares, atividade ne’ebé Komisaun Organizadora liuhosi MAE sei hala’o mak serimonia nasionál ho tema “Ho espiritu loron konsulta populár 30 agostu mai hametin pás no estabilidade ba dezenvolvimentu Timor-Leste” ne’e sei realiza marxa saudvél iha loron 30 agostu no ho atividade desportiva.
“Iha 30 agostu halo marsa saudavel hahú iha rotunda Francisco Xavier do Amaral to’o jardin 05 de Maio Colmera,” Elizeu Ângelo da Costa Soares informa ba Agência Tatoli, iha nia knaar fatin Colmera, Dili, kuarta ne’e.
Aleinde ne’e, nia dehan, atividade seluk ne’ebé MAE prepara no realiza iha serimónia Konsulta Populár mak jogu desportiva hanesan futeból, basketból, voleyból no jogu komunitária mak dada-tali ne’e halo iha nível postu administrativu sira.
“Maibé jogu halai taru karon mak ita halo iha suku sira no sa’e bua ida-ne’e, ami planu sei halo loron 30 agostu,” nia dehan.
Aleinde ne’e, iha loron 29 agostu ne’e sei realiza misa agradesimentu iha Katedral Dili iha parte lorokraik, hodi komemora aniversáriu loron konsulta populár ba dala-XXIII no no hafoin ne’e kontinua ho atividade kari ai-funan iha Palásiu Governu nia oin.
Tuir nia, iha selebrasaun loron konsulta popular ne’e mós MAE realiza feira iha loron 26 agostu to’o 30 agostu, no iha feira ne’e komunidade ida-idak tau nia produtu lokál no aihan lokál sira, livru, artezenatu no seluk tan.
Notísia Relevante: PN husu Governu promove atividade edukativu iha komemorasaun loron istóriku
Kona-ba preokupasaun reprzentante povu iha Parlamentu Nasaionál Governu husu Governu atu promove atividade edukativu iha komemorasaun loron istóriku sira hanesan 30 agostu, nia hatán, Komisaun Organizadora (KO) liuhosi Ministériu Adminitrasaun Estatál (MAE) laiha atividade bola guling iha serimónia konsulta populár ba dala XXIII ne’ebé sei akontese iha 30 agostu.
“Ha’u hakarak klarifika serimónia 30 agostu ne’e laiha atividade ida kona-ba bola guling ne’e, maibé iha aldeia ka suku balun mak iha inisiativa realiza karik tanba jogu ida-ne’e ami nunka hala’o iha loron nasionál sira,” koordenadór ne’e hateten.
Maibé, nia dehan, ho deputadu sira-nia preokupasaun ne’e entaun Komisaun Organizadora sei konfirma ba Autoridade Munisípiu Dili lai tanba atividade feira ho desportivu ne’e iha sira-nia responsabilidade.
“Karik ha’u komunika no konfirma sira mak dehan loos no loke, entaun ha’u haruka sira fó atensaun ba ida-ne’e tanba jogu ida-ne’e la serve loke iha serimónia hanesan komemorasaun konsulta populár,” nia dehan.
Nia reforsa tan katak kalendáriu ba atividade desportu ne’e, MAE la halo ka la realiza no karik iha komunidade balun iha suku balun mak inisiativa realiza entaun ida-ne’e la’ós MAE nia kompeténsia.
Jornalista : Osória Marques
Editór : Cancio Ximenes
