Igreja-Governu konvida Xefe Estadu partisipa misa agradesimentu ba kardeál foun

DILI, 26 agostu (TATOLI)—Prezidente Komisaun Organizadora, Pe. Guilhermino da Silva,  hateten Governu liuhosi Ministéiru Administrasaun Estatál (MAE) hamutuk ho igreja konvida Prezidente Republika atu partisipa serimónia misa agradeseimentu no simu emeniénsia kardeál Don Virgílio Do Carmo da Silva iha 05 setembru, tuku 06h30 dadeersan iha aeroportu Internasionál Prezidente Nicolau Lobato Comoro.

Notísia Relevante: Misa agradesimentu nomeasaun kardeál dahuluk Timor-nian sei realiza iha 06 setembru

Iha enkontru ne’e, Xefe Estadu sente kontente tebes no iha disponibilidade sei partisipa iha serimónia simu kardeál no misa agradesimentu ne’ebé tuir planu sei realiza iha Tasi-Tolu, iha tuku 16h00 lorokraik.

“Ami hosi komisaun konjunta ba serimónia resesaun no misa agradesimentu ba kardeál Timorense primeiru nian hato’o ba Prezidente Repúblika kona-ba serimónia rua hanesan iha loron 05 setembru iha tuku 06h30 dadeer, ita hotu sei ba iha aeroportu Nicolau Lobato atu simu Kardeál ne’ebé sei fila hosi Vátikanu no iha loron 06 fulan setembru iha serimónia misa agradesimentu ba kardeál sei hala’o iha Tasi-Tolu, iha tuku 16h00 lorokraik,” Prezidente Komisaun Organizadora, Pe. Guilhermino da Silva, hateten ba jornalista sira hafoin ramata enkontru ho Prezidente Repúblika (PR), José Ramos Horta, iha Palásiu Prezidensiál Nicolau Lobato, Bairru Pite, sesta ne’e.

Padre Guelhermino informa kona-ba preparasaun komisaun dezde iha loron 15 agostu to’o daudaun ne’e prepara fatin ba misa iha Tasi-Tolu, tenda, haris fatin movel,  kanaliza bee no seluk tan inklui konvite sira daudaun lao ne’ebé kona-ba preparasaun kuaze atinje ona 70%.

Planu komisaun organizadora nian sei konvida Bispu sira iha dioseze viziñu hanesan Darwin-Austrália, Atambua, Kupang-Indonézia se sira iha posibilidade bele mai partisipa iha misa agradesimentu.

Tanba, nia dehan, ida-ne’e hanesan onra boot ida ba povu Timor-Leste no nasaun tanba iha istória dahuluk Vátikanu bele foti hosi ema Timor-Leste hanesan kardeál.

“Kardeál ne’e hanesan pozisaun uma kreda nian ne’ebé servisu hamutuk ho Amu Papa iha Vátikanu maibé parte ida-ne’e la signifika Arsebispu Dom Virgílio sai ona Kardeál no husik Timor, Bispu nafatin hanesan Kardeál no hela iha Timor sei servisu iha Timor,” nia hateten.

Enkuantu orsamentu hodi realiza eventu ria ne’e mai hosi Konferénsia Episkopál Timorense nian no apoiu parte Governu rihun 200-resin.

Entertantu, iha enkontru ho Prezidente Repúblika, hetan akompaña mós hosi Ministru Administrasaun Estatál, Miguel Perreira de Carvalho.

Notísia Relevante: Governu prevee $220.732 realiza resesaun elevasaun Dom Virgílio hanesan Kardeál

Jornalista : Nelson de Sousa

Editór       : Cancio Ximenes