VIQUEQUE, 27 agostu 2022 (TATOLI)- Ministru Justisa (MJ), Tiago Amaral Sarmento, hahú fulan setembru 2022, Ministériu Justisa (MJ) hahú halo tratamentu Billete Identidade (BI) no Sertidaun Moris ba populasaun iha suku 36, iha munisípiu Viqueque.
“Ho preokupasaun hosi xefe suku 36 iha Viqueque, ha’u sente pertinente tebes, nune’e setembru 2022, ekipa sei mai halo lansamentu iha munisípiu Viqueque hodi tratamentu ba Billete Identidade (BI) no Sertidaun Nascimento ka Moris nian,” hateten Ministru Tiago ba jornalista Agência TATOLI, liuhosi telefónika, sábadu ne’e.
Iha setembru ne’e, Ministériu Justisa liuhosi ekipa Notáriadu Nasionál sei ba halo seremónia lansamentu rejista koletiva ba populasaun iha Viqueque.
“Atendementu durante semana ida ka rua iha Viqueque atu atende ema hotu ne’ebé presija trata dokumentu hanesan BI ho sertidaun Moris nian. Ami ho ekipa sei halo mós lansamentu ba rejista online notariadu iha Viqueque iha tempu badak nian laran,” Governante ne’e afirma.
Nune’e, Governante ne’e husu ba abitante hosi munisípiu Viqueque ho pasiénsia oituan tanba tempu badak ekipa sei ba halo atendementu ba komunidade sira suku 36.
“Ha’u husu abitente sira Viqueque atu pasiénsia oituan hodi hein tanba tempu badak Notariadu sei ba uluk hodi atende kestaun ne’e. Hafoin ami ba sei halo serimónia iha Viqueque hodi halo emprime jerál ba komunidade sira iha Viqueque”, nia hato’o.
Alende ne’e, Ministru Justisa ne’e dehan orienta ona Diretór Jerál ba Servisu Rejistu Notariadu sei haruka lalais Notáriu ida ne’ebé foin lalais nomeia ona hodi destaka iha munisípiu Viqueque. Nia tenke ba lalais tanba pessoa refere abandona kna’ar durante loron hirak ona.
Daudaun ne’e, MJ ho ekipa hahú ona atividade emprime BI ho sertidaun Moris no sertidaun RDTL iha suku Com, munisípiu Lautém, suku Kaymauk Turiskai, Manufahi, semana oin sei ba Maubissi hafoin ida ne’e bá fali Viqueque.
Notísia relevante: Xefe suku 36 Viqueque ezije MJ fó tratamentu dokumentu iha baze
Jornalista : Vitorino Lopes da Costa
Editor :Florencio Miranda Ximenes
