Traballadora timoroan na’in-hitu iha Jakarta fila hikas mai TL
DILI, 28 agostu 2022 (TATOLI)—Traballadora timoroan na’in-hitu ne’ebé mak sai vitima ba ajénsia balun hodi haruka sira ba serbisu iha Dubai Uni Emiradu Arabe (UEA) no hafoin “terus” iha Dubai hodi mai hela iha Jakarta ne’e, sábadu (26/8) ne’e, fila hikas ona mai Timor-Leste.
Notísia Relevante: Timoroan na’in-hitu “terus” iha Dubai to’o ona Jakarta
“Iha sábadu (26/8) ne’e, traballadora timoroan na’in-hitu (7) ne’e fila hikas mai Timor-Leste liuhosi terrestre Kupang mai Timor-Leste. Sira-nia repatriasaun ne’e, durante ne’e esforsu hosi ita-nia Governu liuhosi MNEK no Deputadu Parlamentu Nasionál komisaun B rasik. No horisehik sira kosege fila hikas mai iha ita-nia rain liuhosi terrestre Kupang mai Timor-Leste no ita-nia ekipa PCIC mak simu ba direta iha fronteira Batugade, horikalan lori kedan mai iha edifisiu PCIC nia,” Adjuntu Polísia Siéntifika Investigasaun Kriminál (PCIC, sigla portugés), Adino Cabral, via telefônika, domingu ne’e.
Antes ne’e, traballadora timoroan na’in-hitu to’o iha Jakarta Indonézia, nune’e liuhosi Ministeriu Negósiu Estrajeiru Kooperasaun (MNEK) koordena ho Embaixada Timor-Leste iha Jakarta, hodi asegura traballadora timoroan na’in-hitu ne’e.
Durante sira-nia estadia iha Embaixada Timor-Leste iha Jakarta parte Embaixada Timor-Leste nian iha Jakata mak resposavél tomak sira nia nesesidade.
Nune’e bainhira sira to’o iha fronteira Batugade vitima sira diretamente simu hosi Polisia Sientifika Investigasaun Kriminál (PCIC, sigla portugés) no transporta kedan mai iha Dili no bainhira to’o Dili, vitima sira PCIC lori kedan ba iha edifisiu PCIC Caicoli.
Kona-ba finasimentu, parte Embaixada Timor-Leste iha Jakarta mak finansia maibé hakarak atu hatene kle’an liután bele konfirma ba parte ita-nia Embaixada iha Jakarta.
Hatan kona-ba trabaladór na’in-hitu ne’e nia paradeiru hafoin elipa PCIC lori tiha mai iha edifisiu PCIC, daudaun ne’e PCIC asegura hela sira iha uma mahon.
“Kona-ba Vitima nia hela fatin ha’u la fó sai, ne’e segredu justisa,” Adjuntu Adino Cabral informa.
Tuir inforasaun ne’ebé TATOLI asesu pesoál PCIC nia iha domingu (28/8) iha edifisiu PCIC relata katak traballadór na’in-hitu ne’ebé sai vitima hodi ba serbisu iha Dubai ne’e agora daudaun PCIC lori ona ba tau iha uma mahon ida iha Dili laran ne’e no tuir informasaun katak vitima na’in-hitu ne’e sei fila hikas mai iha edifisiu PCIC nian hodi presta deklarasaun iha loron kuarta (31/08) semana oin.
Notísia Relevante: MNEK koopera ho INTERPOL salva traballadora timoroan na’in-hitu “terus” iha Dubai
Jornalista : Natalino Costa
Editór : Cancio Ximenes
