iklan

EKONOMIA, BOBONARO, HEADLINE, MUNISÍPIU, POLÍTIKA

Governu presiza kria kondisaun iha fronteira Balibo hodi redúz atividade ilegál

Governu presiza kria kondisaun iha fronteira Balibo hodi redúz atividade ilegál

BOBONARO, 30 agostu 2022 (TATOLI)-Xefe suku Batugade, postu administrativu Balibo, munisípiu Bobonaro, Januário Moises, husu governu kria kondisaun di’ak ba komunidade sira-ne’ebé hela iha liña fronteira iha suku Cowa no Batugade hodi trava atividade merkadoria ilegál.

Nia aprezenta kestaun ne’e ba Ministru Administrasaun Estatál, Miguel Perreira de Carvalho, iha ámbitu hatuur fatuk dahuluk ba konstrusaun Uma Kbiit Laek (UKL) + katégoria (A) segunda ne’e.

Notísia relevente: Governu sei konstrui moru protesaun  mota Biku-Fafuik iha fronteira Balibo 

“Ami-nia komunidade iha-ne’e, ita bele hatene katak moris iha liña fronteira koñesidu ho ilegál, oinsá atubele hamenus kondisaun ida-ne’e,!ami husu ba nai-ulun sira iha nasionál atubele tau matan, tau asuntu importante ba pontu ilegál, atu nune’e ami-nia komunidade sira bele moris tuir ita-nia lei ne’ebé mak vigora iha nasaun ida-ne’e,” nia hateten ih aintervensaun.

Biban ne’e lideransa komunitária ne’e agradese ba governu tanba hahú ona fihir komunidade sira iha liña fronteira hodi konstrui Uma Kbiit Laek regulár no UKL + kategoria.

“Ami husu atubele tau nafatin prioridade mai suku rua ne’ebé iha liña fronteira, tanba moris iha fronteira ne’e difikuldade barak ne’ebé enfrenta hela,” nia hateten.

Kondisaun bázika ne’ebé komunidade sira iha liña fronteira presiza liu mak enérjia eletrisidade ne’ebé daudaun ne’e iha uma-kain balu mak asesu ona, enkuantu balu to’o agora emerjénsia iha ona, maibé problema fiu mak laiha nune’e iha tempu kalan sei kontinua helik-an iha nakukun nia laran.

Difikuldade seluk mak komunidade sira presiza kanaliza bee-mos tanba durante ne’e komunidade barak mak seidauk asesu ba bee-moos.

Komandante Unidade Patrullamentu Fronteira (UPF), Superintendente Polísia Euclides Belo, reforsa durante ne’e suku Cowa no Batugade sai fatin risku ba atividade merkadoria ilegál ba sasán kontra bandu sira.

Tamba ne’e governu presiza loke merkadu iha fronteira semana ida dala-ida atu hakbiit komunidade suku rua ne’e nia ekonomia atubele prevene atividade tranzaksaun ilegál ba sasán kontra bandu.

“Merkadu movél ne’e tenke iha entre ita ho sira ho Indonézia bodi sosa sasán nesesidade bázika sira, lae sira iha-ne’e la’o-ain ba to’o iha Batugade ne’ebá bazar laiha tiha ona, entaun sira ba fali sosa iha sorin. Ami hala’o edukasaun sívika ba sira katak ita-nia soberania mak hosi ida-nee’e to’o iha-ne’ebá, maibé nesesidade mak obriga sira dehan, ha’u hamlaha la hán iha-ne’e komandante mak fó haan ha’u ka,” nia haktuir.

Tuir dadus monigrafia 2021, postu administrativu Balibo iha aldeia 27 ho total suku neen mak hanesan, Sanirin, Cowa, Leohitu, Leo-Lima, Balibo vila no suku Batugade ho totál populasaun 19,869, ho uma-kain 4,708 ho nia área luan 296 km².

Notísia relevante: Governu presiza prioritiza estrada ligasaun Balibo-Batugade

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!