Top

OPMT-ASSOFAC husu PR lori-fila Saudozu Nicolau Lobato nia restu mortál

Organizasaun Populár Mulher Timor (OPMT) ho Asosiasaun Família Antigu Kombatente (ASSOFAC, siglá portugés) hala’o konferénsia imprensa iha jardim Monumentu Estatua Nicolau Lobato, Comoro, kuarta (31/08). Imajen Tatoli/nelson de Sousa.

DILI, 31 agostu 2022 (TATOLI)—Organizasaun Populár Mulher Timor (OPMT) ho Asosiasaun Família Antigu Kombatente (ASSOFAC, siglá portugés) liu-liu reprezentante faluk no oan-ki’ak sira husu ba Prezidente Repúblika, José Ramos Horta, atu husu ba Indonézia hodi hatudu no lori fila saudozu Nicolau Lobato no eroi seluk nia ruin atu haloot ho dignu.

Portavós Faluk no Oan Ki’ak, Maria Lausina da Costa, hateten hanesan vítima no sobrevivente ezije ba Xefe Estadu atu fó hanoin ba Governu Indonézia atu lori fila saudozu Nicolau Lobato nia restu mortál mai Timor-Leste.

Notísia Relevante: Horta kondekora medalla méritu ba Eis-Jenerál Hendropriyono tanba proposta hosi Falur

“Ami hakarak ezije ba Prezidente Repúblika atu husu ba nasaun viziñu Indonézia hatudu no lori fila ami-nia líder sira, ami-nia laen, aman, inan, oan, maun-bin-alin sira-nia restu mortál no lakon sira, tanbá ami hakarak lori sira fila mai ami família no rai doben ida-ne’ e no ba restu mortál sira sei haloot ho dignu,” Maria Lausina da Costa hateten nia liuhosi konferénsia imprensa ba jornalista sira, realsiona ho Xefe estadu fó kondekorasaun medulla méritu ba esi jenerál Indonézia, Abdullah Makhmud Hendropriyono, iha selebraaun loorn FALINTIL,  iha monumentu Estátua Nicolau Lobato, Comoro, kuarta ne’e.

Kona-ba kondekorasaun, nia husu ba PR atu esplika tanbasá mak Estadu kondekora jenerál reformadu ne’e no husu liu-liu ba Xefe Estadu atu husu ba nasaun viziñu Indonézia hatudu líder sira-ne’ebé mate no lakon ninia restu mortál mai Timor-Leste.

Tanba, Organizasaun Populár Mulher Timor (OPMT) ho Asosiasaun Família Antigu Kombatente (ASSOFAC, siglá portugés) konsidera Prezidente Repúblika kondekora ba Jenerál Reformadu Abdullah Makhmud Hendropriyono, hakanek tebes faluk kombatente no oan ki’ak funu nian ba luta libertasaun nasionál.

Portavós Faluk no Oan Ki’ak, Maria Lausina da Costa hateten, Xefe Estadu kondekora iha loron 20 agostu liubá figura militár haat ho medalla méritu Timor-Leste nu’udar rekoñesimentu ba sira-nia kontribuisaun ba dezenvolvimentu forsa armada iha ámbitu selebra aniversáriu FALINTIL ba dala-47.

“Entre sira na’in-haat ne’e, kondekorasaun ba ema ida-nian ofende tebe-tebes faluk kombatente no oan-ki’ak funu nian ne’ebé sei terus rohan-laek ho konsekuénsia hosi anikilasaun rezisténsia iha tinan sira tuir kedas invazaun Indonézia,” nia hateten liuhosi konferénsia imprensa.

Dekretu Prezidensial númeru 68/2022 ne’ebé refere mós ba kondekorasaun ho medalla méritu ba Jenerál Reformadu Abdullah Makhmud Hendropriyono, (18 agostu 2022) fó sai ninia kna’ar hori uluk nian nu’udar eis Ministru no eis Xefe Servisu Nasionál Intelijensia Indonézia nian no veteranu operasaun Seroja.

Referénsia ikus liu ne’e mak halo faluk no oan ki’ak kombatente sira-nian laran taridu tebes tanba hakanek liután sira-nia moris ho trauma to’o ohin loron.

Operasaun Seroja (Lotus)-invazaun no okupasaun Indonézia hahú lansa iha loron 07

dezembru 1975 no hatutan ho operasaun oioin ho naran oioin hodi hamate hotu líder no aaswa’in sira tomak rezisténsia povu maubere nian.

Durante operasaun Seroja invazaun no okupasaun Indonézia hamate timoroan rihun 102 tuir relatóriu hosi Comissão de Acolhimento, Verdade e Reconciliação (CAVR).

“Ami hakfodak ho kondekorasaun hosi Prezidente Repúblika ba militár Indonézia ida-ne’ebé halo parte operasaun militár atake hosi tasi, lalehan no fronteira terrestre, iha 07 dezembru 1975 no kontinua halo masakre oioin iha tinan sira tuir kedas,” Portavós hosi Faluk no Oan Ki’ak ne’e espresa

Buibere hosi OPMT, hahú tanis ho fuan dodok tebes bainhira rona katak PR kondekora Jenerál reformadu Hendropriyono, ne’ebé tama mós iha lista kriminozu hosi INTERPOL, polísia internasionál.

Iha ne’e, sira-nia parte la kestiona kondekoradu sira seluk ho medalla méritu hanesan Almirante António Manuel Fernandes da Silva Ribeiro, Xefe Estado Maiór-Jenerál Forsa Armada Repúblika Portugueza, Jenerál Angus Campbell, Xefe Estadu Maiór Jenerál Forsa Defeza Commonwealth Austrália, Jenerál Andika Perkasa, Xefe Estadu Maiór Jenerál Forsa Armada Repúblika Indonézia.

Tanba komandante militár na’in-tolu ne’e halo duni parte programa kooperasaun ho FALINTIL-FDTL no laiha istória komete hahalok aat ba povu Timor-Leste.

Nune’e faluk no oan kiak kombatente tombadu ba luta libertasaun nasionál ho laran triste husu ba Prezidente Republika atu husu deskulpa ba vítima no sobrevivente sira tamba kondekora ema liman raan.

Husu ba PR atu esplika ba públiku tomak saida mak lidér sira manán hosi asaun la’ós sensivél ba vítima no sobrevivente sira-nia terus rohan-laek no husu ba PR atu  fó  prioridade ba rekomendasaun sira husi CAVR hanesan kura trauma pos konflitu, relatóriu CAVR mós apela ba justisa, nune’e Indonézia inkui Jeneral reformadu  ne’e tenke  simu responsabilidade ida-ne’e.

Notísia Relevante: Kestaun estratéjika komandu hato’o proposta kondekora Eis-Jenerál Hendropriyono

Jornalista : Nelson de Sousa

Editór       : Cancio Ximenes

Publisidade

Leave a Reply

Latest Post

error: Content is protected !!