PCIC submete ona rezultadu autópsia mate-isin Padre Abito Brites ba MP
DILI, 31 agostu 2022 (TATOLI)— Polisia Siéntífika no Investigasaun Kriminál (PCIC, Sigla Portugés), simu ona rezultadu autópsia mate-isin Padre Abito José Brites Casimiro hosi Hospitál Nasionál Guido Valadáres (HNGV) no submete ona ba Ministériu Públiku (MP), hodi kontinua hala’o prosesu inkéritu atu hatene motivu Padre nia-mate.
Kazu asidente trafégu ne’ebé akontese iha segunda (22/08), rezulta Padre Abito Brites lakon vida no sidadaun feto ida hetan kanek kamaan. Padre matebian Abito hetan asidente tráfegu ho motor tipu Jupiter MX ho xapa matríkula E. 8081.
Notísia relevante: Forensik finaliza ona autopsia ba mate-isin Padre Abito Brites
“Rezutadu autópsia ami simu iha semana kotuk hodi junta hamutuk ho evidénsia balun ne’ebé ami rekolla hodi submete ona ba Ministériu Públiku nuudar na’in ba asaun penál atu halo prosesu inkéritu ka investigasaun,” Portavós PCIC,Octavio da Costa Araújo, hateten ba jornalista sira iha edifisiu PCIC-Colmera, kuarta ne’e.
Kona-ba rezultadu autópsia, nia dehan PCIC labele fó sai ba públiku tanba segredu justisa. Maibé submete ba MP, tanba PCIC simu keixa hosi família no parte igreja ka Dioseze Dili nian hodi husu ba autoridade polisiál sira liuliu PCIC atu halo inkéritu hodi hatene motivu hosi Padre Abito nia-mate.
Hafoin simu keixa, nia dehan PCIC rekolla informasaun iha lokál de krime no konsege rekolla informasaun husi testamuña ka ema ne’ebé intervinente ho prosesu ka kazu ne’e halo hotu ona identifikasaun.
“PCIC konsege rekolla informasaun husi testamuña balun ne’ebé mak, antes Padre Matebian hamutuk ho sira, depois Amo mate sé-sé maka ho amo la’o iha momentu ne’ebá, ita hahú rona no simu informasaun inisiál ona. Evidénsia lubuk ida ita nesesita ba prosesu ne’e no ita konsege rekolla hotu hatama ona ba iha auto notísia hodi haruka ona ba Ministériu Públiku,” Portavós ne’e akresenta.
PCIC ninia devér ramata ona tanba submete ona evidénsia ka informasaun insiál no rezultadu autópsia ba MP, nune’e daudaun hein de’it delegasaun kompetensia hosi Prokuradór Jerál Repúblika atu delega kompetensia ba investiga kle’an kazu ne’e.
“Agora PCIC hein de’it delegasaun kompetensia hosi Miistériu Públiku atu delega ba PCIC ka ba institusaun seluk atu halo inkéritu,” katak portavós ne’e.
Notísia relevante: PNTL kontinua buka sasin ba Padre Abito Brites nia-mate
Jornalista: Natalino Costa
Editór: Florencio Miranda Ximenes
