Traballadora timoroan na’in-hitu hetan tratamentu justu no dignu
DILI, 31 agostu 2022 (TATOLI)—Traballadora timoroan na’in-hitu ne’ebé mak sai vítima ba Ajénsia balun hodi haruka ba servisu iha Dubai Uni Emiradu Arabe (UEA) ne’ebé fila ona mai Timor-Leste ne’e, hetan tratamentu ne’ebé justu no dignu iha uma mahon.
Notísia Relevante: Fila hosi Jakarta, PCIC asegura traballadora na’in-hitu iha uma mahon
“Alin sira (Traballadora timoroan na’in-hitu) ne’e, pelemenus iha ona instituisaun sira-ne’ebé responsável ba asuntu ida-ne’e nia liman, sira iha kondisaun di’ak. Aleinde ne’e, sira mós sei hetan tratamentu ne’ebé di’ak, justu no dignu, tanba ida-ne’e mak organizasaun sira-ne’ebé servisu ba asuntu ne’e nia misaun. Hosi ne’e, ha’u hakarak dehan ba públiku katak, pelemenus sira iha fatin sira-ne’ebé seguru, di’ak no hetan asisténsia di’ak hosi Organizasaun sira-ne’ebé própriu ba servisu asuntu sira-ne’e,” Diretora Ezekutiva, Forum Komunikasaun Feto Timor Lorosa’e (FOKUPERS), Maria Fátima Perreira Guterres, hateten ba Agência Tatoli, iha nia kna’ar fatin, Faról, Dili, kuarta ne’e.
Organizasaun sira ne’ebé halo atendimentu ba vítima, sira mós iha prosedimentu no regulamentu ida hodi fó tratamentu dignu ba vítima sira tuir enkuadramentu legal sira ne’ebé prevee ona.
Maske nune’e, prosesu ba traballadora timoroan na’in-hitu ba oin, instituisaun ne’ebé servisu ba asuntu ne’e sei la servisu mesak maibé sei servisu hamutuk ho parte relevante sira inklui Polisia Sientifika Investigasaun Kriminál (PCIC).
“Ba oin, ita mós sei la servisu mesak, tanba ida ne’e asuntu sosiál no transversál ne’ebé liga ho kestaun ida no ida seluk. Momentu sira ba ne’e mós tanba problema servisu ne’ebé ezijénsia hosi sira-nia parte atu bele ba servisu iha rai-li’ur, entaun ida-ne’e mós liga ho kampu traballu no kestaun imigrasaun no oras ne’e daudaun espesifiku mós ba iha kestaun legál nian,” nia dehan.
Hosi ne’e, atu ko’alia kona-ba nia kontinuidade ka asustentabilidade ba traballadór na’in-hitu ne’e, organizasaun sira ne’ebé servisu ne’e sei la servisu mesak maibé sei nafatin servisu hamutuk ho parte relevante sira atu haree kona-ba prosesu sira-ne’ebé sei la’o, depois ba asisténsia sosiál nian.
Oganizasaun sira ne’ebé servisu ba asuntu ne’e, sei halo sira-nia papél maibé iha kestaun liberdade sei nafatin servisu hamutuk, inklui ho parte PCIC atu haree oinsá ho prosesu legál sira ne’ebé iha, nune’e sira na’in-hitu bele to’o iha prosesu sira ho dalan ne’ebé justu no tuir nia dalan ne’ebé loos.
Tanba ne’e, Diretora FOKUPERS ne’e nafatin enkoraja ba familia sira, se hakarak duni atu hasoru (Traballadora timor oan na’in-hitu) koko hasoru malu ho parte PCIC no ba pesoál sira ne’ebé enkaregada ba asuntu ne’e, karik maluk PCIC sira sei fasilita prosesu sira-ne’e hodi komunika ho organizasaun sira-ne’ebé fó hela asisténsia.
“Aleinde ne’e, ba familia no públiku sira katak labele preokupa no tauk ba traballadora timoroan na’in-hitu nia kondisaun, tanba daudaun ne’e sira iha hela instituisaun sira-ne’ebé responsável no fó asisténsia. Maibé, buat ne’ebé importante mak se ita-boot sira hatene lala’ok sira dezde inisia atu kontribui ba iha sira-nia prosesu, liu-liu prosesu legál nian, favór kontribui mós ba evidénsia sira atu nune’e ita bele hetan justisa sira-ne’ebé ita hotu hakarak, justu no dignu ba alin oan sira,” nia apela.
Notísia Relevante: Traballadora timoroan na’in-hitu iha Jakarta fila hikas mai TL
Jornalista : Nelia Fernandes
Editór : Cancio Ximenes
