VIQUEQUE, 01 setembru 2022 (TATOLI)–Ministru Petróleu no Minerál (MPM) interinu no atuál Ministru Administrasaun Estatál (MAE), Miguel Pereira de Carvalho, enserra atividade levantamentu dadus rai no propriedade iha área dezignadu planta LNG, iha Beaço, suku Maluro, postu administrativu Viqueque Vila, munisípiu Viqueque, ne’ebé finaliza ona iha.
Tuir Ministru, Governu liuhosi MPM komprometidu atu dada kadoras mai Timor-Leste.
“Governu iha pozisaun klaru kona-ba asuntu projetu tasi mane katak kadoras tenke dada mai ita-nia rain Timor-Leste iha área Beaço. Ohin ha’u mai reprezenta Ministru Petróleu no Minerál ne’ebé durante ne’e esforsu hodi garante katak polítika no planu estratéjiku ne’e tenki atinje,” Ministru Miguel Pereira hateten hafoin ramata enserra serimónia levantamentu dadus rai no propriedade, iha Beaço, kinta ne’e.
Notísia relevante: Ekipa levantamentu dadus rai no propriedade iha Beaço finaliza atividade
Nune’e, governante ne’e husu komunidade Beaço labele dúvida ba kompromisu Governu nian bainhira ko’alia kona-ba projetu tasi mane, tantu hosi aspetu tékniku no ekonómiku.
“Ministru Petróleu no Minarál foin lalais to’o iha Austrália hodi hasoru ho Ministru Rekursu Naturál Austrália nian no hasoru empreza Woodside, ne’ebé Ministru hato’o Governu Timor-Leste ninia kompromisu katak kadoras tenke mai Timor Leste. Ha’u hanoin ida-ne’e importante ba ita hotu, liuliu komunidade Maluro atubele hatene polítikamente pozisaun Governu,” nia akresenta.
Iha fatin hanesan, Prezidente Konsellu Administrasaun Timor Gás no Petróleu, Empreza Públika (Timor GAP, E.P), António de Sousa, hateten, programa ne’e nu’udar kompromisu Governu hodi garante interese nasionál atu dada kadoras hosi kampu Greater Sunrise mai Timor-Leste
“Estudu tékniku no komersiál lubuk ida maka halo ona iha tinan hirak liubá iha área dezignadu ba Planta LNG Beaço. VIII Governu Konstitusionál liuhosi Ministériu Petróleu no Minerál no Timor GAP halo ona diálogu ho komunidade Beaço iha dezembru 2021 no iha janeiru 2022, Komunidade Beaço ho konsiénsia rasik halo akta deklarasaun entrega rai dezignadu ba planta LNG iha Beaço ba Governu,” nia haktuir.
Atu konkretiza kompromisu sira maka MPM no Timor GAP, E.P serbisu hamutuk ho ekipa interministeriál halo ona programa sensibilizasaun informasaun iha loron 20 juñu 2022 hodi kontinua kedas ba atividade levantamentu dadus rai no propriedade iha rai ektare 574 iha suku Maluro, Beaço.
“Ekipa interministeriál koopera hamutuk ho autoridade lokál, ekipa task force, lia-na’in no veteranu hodi konklui atividade ho di’ak no susesu,” nia tenik.
Objetivu identifikasaun rai no properiedade maka atu rekolla dadus relevante iha área dezignadu ba planta LNG hanesan dadus rai no ai-horis ne’ebé iha valór ekonomia, peska no pekuária, uma, kulturál hanesan rate, sadan, uma-lulik no seluk tan.
Ekipa interministeriál konklui ona atividade, ho nune’e ofisiálmente hala’o seremónia enserramentu ba faze identifikasaun no levantamentu hodi MPM atribui mos sertifikadu apresiasaun ba ekipa ne’ebé partisipa iha prosesu.
Faze tuir mai, ekipa téknika sei prepara dadus no mapa hodi bele publika rezultadu identifikasaun iha tempu badak, atu nune’e komunidade bele haree hodi konfirma karik iha dadus ka informasaun ruma ne’ebé ladún loos, ekipa sei hala’o verifikasaun iha terrenu hodi hadi’a no ajusta dadus.
Rezultadu dadus levantamentu rai no propriedade iha Beaço iha rai parsela hamutuk 870, kompostu hosi uma 470, peska 41, kolam 33, pekuária 209, uma-lisan hosi Maluro 34 no uma-lisan hosi suku Uma-uain Leten aldeia Macaleko hamutuk 15, Kailoibere ualu, ho totál uma-lisan hamutuk 57 no rate musulmanuida, rate públiku 20 no rate dato tolu.
Dadus sira-ne’e ekipa sei lori ba nasionál hodi analiza no halo mapa durante loron-30, hafoin ekipa Timor GAP, E.P no ekipa interministeriál taka sai rezultadu iha suku Maluro no taka iha edifísiu Terras no Proriedade munisípiu Viqueque.
Serimónia ne’e partisipa hosi Brigaderu FALINTIL-Forsa Defeza Timor-Leste (F-FDTL), Sabika Besi Kulit, Administradór munisípiu Viqueque, Diretór Terra no Propriedade munisípiu Viqueque, Komadante Polísia Nasionál Timor-Leste (PNTL) inklui komunidade lokál.
Jornalista : Vitorino Lopes da Costa
Editora : Julia Chatarina
