DILI, 02 setembru 2022 (TATOLI)—Prezidente Parlamentu Nasionál, Aniceto Longuinhos Guterres Lopes, hateten vizita delegasaun Parlamentu Nasionál (PN) Timor-Leste ba PN Indonézia atu hametin liután relasaun bilaterál.
Notísia Relevante: PN TL-PN Indonézia hala’o kooperasaun iha área mídia-protokolu parlamentár
“Vizita PN Timor-Lesta ba DPR-RI ne’e forma diplomásia parlamentár halo atu hametin atu apoiu polítika Estadu nian relasaun bilaterál ho Indonézia,” Aniceto Guterres hateten ba jornalista sira hafoin ramata enkontru ho Prezidente Repúblika (PR), José Ramos Horta, iha Palásiu Prezidensiál Nicolau Lobato, Bairru Pite, sesta ne’e.
Lidér segundu órgaun soberania ne’e relata informasaun sira kona-ba vizita delegasaun PN nian ba Indonézia ba Xefe Estadu, tanba vizita pozitivu tebes ne’ebé ida-ne’e vizita foin hala’o dahuluk
“Vizita amizade grupu parlamentár entre rai rua ne’e hosi deputadu Timor no hosi amizade grupu parlamentár mós ba no durante ne’e hosi Indonézia mós mai, agora vizita nivél hosi Parlamentu ba DPR-RI hanesan Prezidente PN sira-nian foin mak primeira vez depois ita restaura ita-nia indepedénsia,” nia dehan.
Nune’e, rezultadu hosi enkontru delegasaun ba iha Indonézia la’o di’ak, mezmu nune’e Prezidente PN ne’e la ko’alia detallu kona-ba pontu inportante sira-ne’ebé sira diskute.
“Vizita di’ak, DPR-RI sira simu delegasaun PN. Parese sei iha vizita resiprosidade hosi ketua DPR-RI sei mai fali Timor-Leste iha tinan oin tanba tinan oin atu konside ho komemorasaun loron restaurasaun indepedénsia 20 maiu atu sai konvidadu espesiál,” nia informa.
Enkuantu, tuir pájina Pajina PN katak Prezidente Parlamentu Nasionál, Aniceto Longuinhos Guterres Lopes, halo vizita traballu ba Indonézia hasoru malu ho nia ómologu Prezidente Parlamentu Indonézia(Ketua Dewan Perwakilan Rayat- Republik Indonesia/DPR-RI) Puam Maharani, hodi halo kooperasaun iha área prokolu Parlamentár no mídia.
Vizita Prezidente Parlamentu Nasionál ne’e akompañadu mós grupu amizade Parlamentu Nasionál Timor-Leste ba Indonézia ho objetivu hametin amizade entre Parlamentu Nasionál rai rua nian.
Asuntu importante ne’ebé mak ko’alia iha enkontru mak hametin nafatin lasu amizade entre nasaun rua, liu-liu fallow-up kooperasaun sira-ne’ebé Estadu rua halo tiha ona, hanesan iha área ekonómia, oinsá dezenvolve ekonómia entre nasaun rua.
Sira diskute no identifika obstaklu saida mak rai rua hasoru, nune’e rezolve hodi haree ba posiblidade investimentu ne’ebé bele konkretiza liu-liu merkadu fronteira TL ho Indonézia, hametin relasaun kulturál entre RI no TL.
PPN hasoru malu ho nia ómologu diskute mós problema estudante Timoroan ne’ebé agora daudaun hala’o estudu iha Indonézia, hanesan kitas, visa no propina
Vizita PPN ne’ebé akonpaña hosi Deputadu Grupu Amizade Parlamentu Nasionál Timor-Leste ba Indonézia, ko’alia mós kona-ba rate heroi TL ne’ebé mate iha prosesu luta libertasaun nasionál.
Notísia Relevante: Delegasaun PN kari aifunan iha ativista Ade Sitompul nia rate
Jornalista : Nelson de Sousa
Editór : Cancio Ximenes
