MSSI aprova benefisiáriu Bolsa da Mãe Jerasaun foun na’in-632 iha Bobonaro
BOBONARO, 06 setembru 2022 (TATOLI)- Ministériu Solidariedade Sosiál no Inkluzaun (MSSI) aprova ona lista benifísiariu programa Bolsa da Mãe Jerasaun Foun iha munisípiu Bobonaro hamutuk na’in-632 mak sei hetan subsídiu hosi governu.
Diretór sentru solidariedade Sosiál munisípiu Bobonaro, Francisco Tilman, esplika benefisiáriu hirak-ne’e prenxe ona kritéria hanesan, ba konsulta iha klínika no ospitál referál sira-ne’ebé estadu prepara, lori kartaun eleitorál, billete identidade no pasporte, loke konta bankária hosi Banku Nasionál Komérsiu Timor-Leste (BNCTL, sigla portugés).
Notísia relevante: MSSI prevee $5,394.120 ba programa bolsa da mãe atuál kondisionál
“Totál benefisiáriu Bolsa da Mãe Jerasaun Foun iha munisípiu Bobonaro 632 ne’e mak ita aprova ona, sira-nia osan iha fulan kotuk tama ona iha konta bankária BNCTL nasionál, maibé to’o ohin loron seidauk halo pagamentu tanba kritériu banku nia depende ba sistema,” nia informa ba Jornalista sira, iha Maliana, segunda ne’e.
Programa Bolsa da Mãe jerasaun foun ho objetivu prisnsipál mak atu mellora rendimentu familiár, estímula eradikasaun pobreza no hamlaha, mellora saúde no nutrisaun inan isin-rua no labarik.
Nune’e mós promove atividade ekonomia lokál no hasa’ee kualidade edukasaun hodi kontribui ba atinjimentu objetivu dezenvolvimentu sustentável.
Enkuantu valór transferénsia maka $15 kada fulan ba inan isin-rua no $20 kada fulan ba oan ida iha 2022, maibé valór ne’e sei revee hodi ajusta kada tinan bazea ba taxa inflasaun.
“Ha’u-nia mensajen ba ita-nia inan sira iha munisípiu Bobonaro, atu hakbesik-aan postu saúde ne’ebé besik atu nune’e bele halo tratamentu ne’ebé dignu tuir posiblidade governu nian, tanba fasilidade kompletu iha sentru saúde idak-idak atu redús kazu mortalidade inan no oan,” nia apela.
Bolsa da mãe jerasaun foun
Governu nia programa asisténsia sosiál ba inan isin-rua no labarik ho tinan 0-3, kontinua to’o tinan 6. Iha suplementu adisionál ba labarik sira ho moras króniku ka defisiénsia.
Programa ne’e ho objetivu atu hamenus pobreza, hadi’ak saúde no nutrisaun, redúz ra’es-badak no haburas ekonomia ba hotu-hotu.
Programa ne’e hahú uluk iha munisípiu Ainaro, Bobonaro no Rejiaun Administrativa Espesiál Oé-Cusse Ambeno (RAEOA) iha tinan 2022 no sei haluan neineik ba territóriu tomak.
Rejistrasaun subsídiu inan isin-rua
Rejistu ba subsídiu inan isin-rua ne’e kada inan isin-rua bele vizita fasilidade saúde, konsulta ho pesoál saúde no aprezenta dokumentu pesoál.
Dokumentu sira-ne’ebé utiliza ne’e tenke inan-aman sira-nian mak hanesan kartaun eleitorál ka BI ka pasaporte, livriñu saúde inan no oan, fixa família (diresaun atuál), kaderneta banku ka konta bankária no númeru telefone ne’ebé ativu.
Rejistu subsídiu ba labarik
Atu rejistu subsídiu ba labarik ne’e inan-aman sira tenke lori labarik ba vizita fasilidade saúde, konsulta ho pesoál saúde no aprezenta dokumentu ba osfisiál rejistu sira.
Inan-aman tenke hatudu kartaun leitorál ka BI ka pasaporte, fixa família, kaderneta banku ka konta bankária no númeru telefone ativu.
Dokumentu ba labarik nian tenke hatudu Livriñu Saúde Inan no Oan (LISIO) no sertidaun moris nian (bainhira posivel).
Rejistu ba suplementu adisionál
Rejistu ba suplementu adisonál labarik ho defisiénsia ne’e, presiza lori labarik ba vizita fasilidade saúde, konsulta ho pesoál saúde no aprezenta dokumentu sira ba ofisiál rejistu no dokumentu hanesan ho psosesu rejistrasaun subsídiu ba labarik.
No, dokumentu adisionál mak sertifikadu ka deklarasaun hosi médiku kona-ba labarik nia moras króniku ka defisiénsia iha Livriñu Saúde Inan no Oan (LISIO).
Simu pagamentu
Pagamentu kada fulan sei hahú hafoin aplikasaun hetan aprovasaun. Pagamentu sei tama ba konta bankária ne’ebé nomea ka konta bankária BNCTL ne’ebé programa kria ba ita.
Subsídiu ba inan isin-rua sei para bainhira inan partu. Se inan hetan abortu, pagamentu nafatin kontinua to’o estimasaun loron partu nian.
Subsídiu ba labarik, inklui labarik ho defisiénsia sei para bainhira labarik to’o ona tinan neen (6).
Uza osan
Osan hosi subsídiu ne’e sei uza hodi tulun família ba nesesidade loron-loron nian (ai-han, transporte, ai-moruk) hodi promove inan no labarik nia saúde no nutrisaun liuhosi sosa no han hahán oioin ne’ebé saudável, konsulta ante-natál (ANC) dala ualu (8) no pos-natál (PNC) dala haat (4).
Nune’e mós ba fasilidade saúde atu hetan imunizasaun no monitoriza kresimentu, toba iha muskitériu laran, fase liman ho sabaun molok haan, prepara hahán no hafoin soe bee-boot no bee-kiik.
Notísiasia relevante: MSSI husu BNCTL benefisiáriu “Bolsa da Mãe Jerasaun Foun” uza kartaun eleitorál
Jornalista: Sérgio da Cruz
Editór: Evaristo Soares Martins
