COVALIMA, 06 setembru 2022 (TATOLI)–Vise Prezidente Komisaun Organizadora, Maria Carvalho Amarál “Biki’ak” husu Governu deside loron 06 setembru sai hanesan loron feriadu nasionál iha Timor-Leste.
Notísia Relevante: Hapara violénsia, joven iha Dili hemu tintu-joven Covalima labele lanu
“Ha’u hakarak husu ba Estadu Timor-Leste, loron 06 setembru tenke sai hanesan feriadu nasionál tanba loron ida-ne’e mak hamosu masakre setembru nergo 1999, ne’ebé rezultadu ema 100-resin mate inklui padre na’in-tolu fó sira-nia vida hodi liberta ita-nia rain,” Maria Carvalho hateten ba Ag^encia Tatoli, iha monumentu masakre Setembru Negro 1999, tersa ne’e.
Tuir nia, Estadu tenke konsidera no valoriza hodi deside loron ida-ne’e sai hanesan loron feriadu nasional iha Timor-Leste.
Sekretáriu Estadu Asuntu Veteranu Kombatente Libertasaun Nasionál, Júlio da Conceição “Loro Mesak”, aseita loron 06 setembru sai hanesan loron feriadu nasionál maibé sei aprezenta iha reuniaun Konsellu Ministru.
Iha tempu badak, nia parte sei aprezenta pedidiu ne’e iha reuniaun Konsellu Ministru no ida-ne’e sai hanesan traballhu de kaza ida ba nia atu haktuir.
“Tanba ida-ne’e sai hanesan trabalu de kaza ida mai ha’u, hanesan sekretáriu Estadu Asuntu Veteranu Kombatente Libertasaun Nasionál, ha’u sei aprezenta iha reuniaun Konsellu Ministru nian,” nia dehan.
Notísia Relevante: Sobrevivente Masakre Setembru Negro husu joven buka hatene istória pasada TL
Jornalista : Celestina Teles
Editór : Cancio Ximenes
