Governu nomea Acilino Branco lidera ekipa misaun apoia Guiné-Bissau
DILI, 09 setembru 2022 (TATOLI)–Ministru Administrasaun Estatál (MAE), Miguel Pereira de Carvalho, hateten Governu nomea ona dirijente na’in-rua liu-liu indika Acilino Manuel Branco atu lidera Ekipa Unidade Misaun ba Apoiu Prosesu Resensieamentu Eleitorál ba Guiné-Bissau 2022.
Notísia Relevante: Governu sei deside Misaun Xefe Unidade apoia resenseamentu eleitorál iha Guiné-Bissau
“Ita kria ona ekipa Unidade Missaun ba Guiné-Bissau. Ami propoin ona Diretór Jerál Sekretariadu Tékniku Adminitrasaun Eleitorál (STAE), Acilino Manuel Branco, ho ninia diretór adjuntu mak Diretór ba Informasaun no Teknolojia. Hosi kargu ba dirasaun no hosi kargu xefia hosi STAE atu prezide ekipa ida-ne’e,” Governante ne’e hateten ba Agência Tatoli, iha Sentru Konvensaun Dili (CCD-sigla portugés), Merkadu Lama, Dili.
Dirijente na’in-rua ne’e ho ekipa téknika na’in haat (4) sei fó apoiu prosesu resensiamentu eleitorál iha Guiné-Bissau to’o de’it loron 15 novembru 2022 tuir lei hateten.
Husu kona-ba nomesaun formál ba ekipa ne’e, ministru ne’e hatán, Governu aprova ona Dekretu-Lei ida atu kria ekipa unidade ida no nomea ona dirijente na’in-rua refere.
“Ekipa ne’e, kabe ba h’au-nia kompeténsia atu propoin dirijente na’in-rua ne’e ba MNEC atu koordena serbisu di’ak liután iha prosesu ne’e,” nia dehan.
Husu mós kona-ba sira-nia arrankamentu, ministru ne’e dehan katak se laiha problema ruma ho kestaun administrasaun, ekipa ida-nee sei aranka ba Guiné-Bissau iha semana oin.
Entretantu, Diretór Jerál Sekretariadu Administrasaun Eleitorál (STAE), Acilino Manuel Branco, hateten mesmu hetan despaixu ona hosi MAE maibé presiza despaixu ida tán hosi MNEK.
“Tuir proposta hosi MAE katak ha’u mak lidera hanesan diretór ba xefe unidade apoiu prosesu resensiamentu ba iha Guiné-Bissau, maibé tuir dekretu Governu 23/2022, katak tenke iha despaixu nomeasaun Ministériu Negósiu Estranjeiru no Koopersaun (MNEK) hosi proposta ne’ebé mak MAE submete ona ba MNEK,” nia dehan .
Notísia Relevante: Governu aprova kriasaun misaun apoiu prosesu resensiamentu eleitorál Guiné-Bissau
Jornalista : Osória Marques
Editór : Cancio Ximenes
