DILI, 09 setembru 2021 (TATOLI)-Jenerál Reformadu, Lere Anan Timur, kongratula Francisco Guterres Lú Olo ho Marí Alkatiri, ne’ebé re-eleitu sai Prezidente no Sekretáriu Jerál Partidu FRETILIN ba períodu 2022-2027 liuhosi konfereénsia nasionál loron dahuluk ne’ebé realiza iha kinta (08.09) horisehik.
Notísia Relevante: Lú Olo-Alkatiri re-eleitu sai Prezidente-Sekretáriu Jerál FRETILIN períodu 2022-2027
“Maun Lú Olo ho Marí mak nafatin manán. Laiha dúvida. Pakote úniku ne’e, Ha’u-nia parabéns ba sira,” Lere Anan Timur hateten ba jornalista iha iha Sentru Konvensaun Dili (CDD.
Lere hatutan, nia parte antes ne’e nunka dehan atu forma pakote ho sé de’it no dehan de’it ba kongresu mak deside.
“Ha’u nunka dehan forma pakote ho sé de’it no dehan de’it ba kongresu mak ha’u deside. Nune’e horisehik iha kongresu ha’u hateten katak imi asembleia ne’e hakarak fó konfiansa mai ha’u atu kandidata an forma pakote, agora mak deside maibé to’o iha ne’eba ema ida la deside. Depois ha’u hateten tan kuandu maun Mari no Lú Olo avansa nafatin ha’u labele kompete ho sira. Tanba ha’u-nia prinsípiu uluk ha’u ka’er mak mai la’ós atu kompete ho ema ida no adversáriu ba ema ida, entaun ida-ne’e mak pakote úniku,” nia klarifika.
Lere hateten, nia parte sente susesu no orgullu liu ba kongresu ne’e mak bele rekuiñese nia hanesan segundu jerasaun komite sentrál Fretilin tanba uluk la rekuiñese ona nia hanesan membru CCF.
“Ha’u-nia susesu iha kongresu mak rekuiñese segundu jerasaun komite sentrál Fretilin 1981, ida ne’e mak ha’u-nia susesu. Ida mak orgullu no hanoin ida-ne’e la’ós rekuiñese de’it ha’u Lere maibé rekuiñese ha’u-nia maluk kompaneiru sira-ne’ebé mak ohin loron la hamutuk, hahú hosi saudozu Mauhudu, Sakinere, Arinere, Olinatasa, Conisantana, Daitula no sira seluk,” nia dehan.
Nia parte sei la hola parte kargu ruma iha estrutura partidu ba periodu 2022-2027, maibé hanesan membru CCF no membru CCF segundu jerasaun, nune’e hakarak agradese ba Komite Sentrál Fretilin (CCF).
Maibé antes ne’e públiku hatene katak, Lere Anan Timur, avansa iha pakote komepete iha kongresu lideransa partidu Fretilin, maibé nia dehan, haree situasaun ambiente kongresu horisehik ladi’ak no bainhira iha eleisaun direta karik nia-parte kompete duni tanba masa ka forsa polítika sei manán maibé ida-ne’e kongresu sé mak mai la hatene no nunka prepara pakote ida.
“Ita dehan DNF mak prepara pakote mais h’au kuandu hakarak ba tiru malu ne’e ho ha’u-nia kompañia para ha’u ba ne’e ita mate hotu maibé agora ha’u ba ho fali kompañia ida mak ba ne’e laran ragu-ragu ne’e mak hanoin katak laiha buat ida, apela ba ha’u-nia apoiante sira Fretilin nafatin ita-nian nafatin labele lakon iha povu nia oin,” nia hateten.
Notísia Relevante: Lú Olo: kongresu FRETILIN dalimak hametin prinsípiu lori naroman ba povu
Jornalista : Nelson de Sousa
Editór : Cancio Ximenes
