iklan

DILI, HEADLINE, POLÍTIKA

Lú Olo kompromete hamutuk ho povu sei haboot FRETILIN

Lú Olo kompromete hamutuk ho povu sei haboot FRETILIN

Prezidente Partidu FRETELIN, Francisco Guterres Lú Olo. Imajen Tatoli/António Daciparu.

DILI, 09 setembru 2021 (TATOLI)—Prezidente Partidu Frente Revolsionáriu Timor-Leste Independente (FRETILIN), Francisco Guterres ‘Lú Olo’, kompromete katak nia parte hamutuk ho povu sei haboot liután partidu FRETILIN.

Notísia Relevante: Lere Anan Timur kongratula Lú Olo ho Marí Alkatiri

Lú Olo hatutan, prosesu eleisaun líder FRETILIN iha kongresu nasionál dalimak ne’e laiha ema ida mak lakon no laiha ema ida mak manán.

“Prosesu ida-ne’e internu FRETILIN ninian, tanba ne’e duni iha FRETILIN nia laran laiha ema ida lakon no manán, nune’e FRETILIN sei kaer malu metin no solídu nafatin atu hakat ba oin. FRETILIN mak sei sai lalenok atu halo polítika hakat ba oin atu bele filafali ba povu, hamutuk ho povu atu liberta ita-nia povu ida-ne’e,” Lú Olo hato’o ba jornalista sira hafoin  halo juramentu no simu pose ba Prezidente Partidu FRETILIN períodu 2022-2027, iha Sentru Konvensaun Dili (CCD), sesta ne’e.

FRETILIN nu’udar partidu polítiku ida atu lori partisipa iha prosesu dezenvolvimentu nian, hanesan iha sistema ida multipartidarizmu FRETILIN  respeita prinsípiu igualdade no demokrasia nian no respeita povu nia vontade.

‘’Tuir polítika FRETILIN hanoin daudaun atu la’o ba oin halibur ema hotu. Ida-ne’e la’ós agora, maibé agora mai reforsa liu,” nia hateten.

Tan ne’e, desizaun eleisaun ba líder partidu períodu 2022-2027 ne’e, ema hotu kumpre no tane aas liu hotu iha kongresu, no partidu nia misaun no vizaun klaru ba futuru Timor-Leste ninian tuir tema kongresu atu lori filafali naroman ba povu.

“Signifika durante tempu ida ita ukun iha governasaun ida-ne’e nian, FRETILIN sei aposta nia an dala ida tan hodi halo intervensaun liuhosi prosesu sira tuirmai FRETILIN bele realiza povu ida-ne’e nia hakarak tuir mehi erói no martir sira-nian,” nia dehan.

Ho ida-ne’e, tuir Lú OLo, vizaun klaru FRETILIN hakarak lori naroman ba povu liuhosi prosesu lori programa no polítika FRETILIN ninian ba povu Timor-Leste nia moris di’ak.

Iha kongresu ne’e, FRETILIN prepara nia an hodi hasoru eleisaun parlamentár iha tinan 2023, naturalmente FRETILIN iha programa ne’ebé mak sei sai hosi kongresu ne’e sei diskute tema sentrál partidu FRETILIN.

Enkuantu, Francisco Guterres ‘Lú Olo’ no Marí Alkatiri, re-eleitu ba Prezidente Partidu FRETILIN no Sekretáriu Jerál FRETILIN ba períodu 2022-2027, no iha kongresu loron daruak sesta ne’e halo ona juramentu no simu pose hosi meza jurizdisaun kongresu nian.

Notísia Relevante: Lú Olo-Alkatiri re-eleitu sai Prezidente-Sekretáriu Jerál FRETILIN períodu 2022-2027

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!