DILI, 13 setembru 2022 (TATOLI)— Prokuradór Jerál Repúblika (PJR), hasai ona despaisu hodi delega kompeténsia ba Prokuradór Titulár Jacinto Babo, atu hala’o inkéritu ba Padre Abito José Brites Casimiro nia-mate.
Padre Abito mate tanba deskonfia hetan asidente tráfegu iha Dare-Dili, iha segunda (22/08), ho motór Jupiter MX, xapa matríkula E 8081.
Notísia relevante: PCIC submete ona rezultadu autópsia mate-isin Padre Abito Brites ba MP
“Agora kazu ne’e, Prokuadór Jerál Repúblika (PJR) despaixa ona mai ha’u atu haree ba kazu ne’e. Hanesan Prokuradór Titulár ba kazu ne’e. Nune’e ha’u labele ko’alia buat ida liga ho kazu ne’e, tanba ha’u mak titulár ba kazu ne’e. Maibé atu ko’alia klaru ne’e Prokuadór Jerál Repúblika maka bele fó sai klaru liu kona-ba ida ne’e,” dehan Prokuradór Titulár Jacinto Babo ba Agência TATOLI via telefónika, tersa ne’e.
Prokuradór Jacinto Babo akresenta, kazu ne’e parte MP seidauk bele halo inkéritu, tanba Tribunál sei iha hela feriadu judisiáriu.
“Hafoin feriadu judisiáriu iha loron 16 setembru ne’e, mak Ministériu Públiku hahú loke investigasaun ba kazu ne’e,” nia afirma.
Daudaun ne’e, Prokuradór Jerál Repúblika (PJR), Alfanso Lopes, mós prepara ona relatóriu ba Padre Abito nia-mate, atu tempu badak nia laran relata ba Prezidente Repúblika José Ramos Horta.
Antes ne’e, Polisia Siéntifika Investigasaun Kriminál (PCIC, sigla portugés), submete ona rezultadu otópsia no informasaun báziku sira seluk relasiona ho Padre Abito José Brites Casimeiro nia-mate ba Ministériu Públiku (MP), hodi kontinua halo prosesu inkéritu atu motivu ba padre-nia mate.
Notísia relevante: PNTL kontinua buka sasin ba Padre Abito Brites nia-mate
Jornalista: Natalino Costa
Editór : Florencio Miranda Ximenes
