DILI, 13 setembru 2022 (TATOLI)—Bainhira bainaka ida vizita Dili mak seidauk vizita fatin destinasaun turistiku Cristo Rei Fatucama, Dili, nia sente lakon oportunidade ida furak tebes.
Notísia Relevante: MTKI loke ona konkursu hadi’a gazebo iha Areia Branca
Bainhira vizita Cristo Rei mak vizitante ida la laran monu ba rai-henek mutin iha Areia Ranca no la tuur iha uma gazebo nia okos ho família, sira-nia viajen sei lakon nia kmanek.
Bainhira rai-henek mutin nahe-an nabilan maibé uma gazebo sira-ne’ebé harii iha tasi-ibun ne’e, Governu la tau matan no la hadi’a hodi husik monu no aat nune’e leet de’it mak sei estraga Areia Branca nia furak.
Situasaun ida-ne’e mak Pesoál Limpeza iha Cristo Rei, Celestina Ximenes, sente no husu ba Governu liuhosi Ministériu Turizmu no Komérsiu Indústria (MTCI, sigla portugés) atu reabilita ka hadi’a lalais uma gazebo iha Areia Branca ne’ebé balun monu no aat ona.
“Ita-nia uma gazebo sira iha tasi-ibun Areia Branca ne’e, ita presiza hadi’a. Bainhira ita simu tinan foun 2023 ne’e, uma gazebo sira-ne’e bele di’ak ona, nune’e vizitante sira bele uza,” Celestina Ximenes, hateten ba Ajénsia Tatoli, iha jardin Cristo Rei, Díli, tersa ne’e.
Tuir nia, fatin turístiku ka uma gazebo sira iha tasi ibun ne’e importante atu hadi’a tanba uma sira-ne’e kle’ur tebes ona maibé Governu hanesan la tau importánsia atu reabilita ka hadi’a lalais.
“Ita-nia uma gazebo sira iha tasi ibun ne’e presiza hadi’a, tanba aat kleur ona. Aleinde ne’e, uma sira-ne’e bele dada ema estranjeiru sira atu vizita Areia Branca no Cristo Rei Fatucama. Ne’ebé, hanesan ha’u husu ba Governu presiza hadi’a lalais atu nune’e tama tinan foun ita bele uza,” nia hateten.
Estudante hosi Ensinu Superiór Privadu, Dili Institute of Technology (DIT), Januario Baptista Belo, mós konsidera kondisaun ba fatin turistiku iha Cristo Rei ne’e agora la di’ak tanba Governu la tau matan hodi hamoos no hadi’a gazebo sira-ne’ebé aat no balun monu tiha ona.
“Agora ita haree ba Areia Branca ne’e kondisaun ladi’ak no grave loos, tanba uma gazevo sira iha ne’e balun monu no balun aat ona. Hanesan sidadaun no estudante ida. Ha’u sente triste tanba ita-nia Governu sira seidauk tau matan ba fatin turistiku ida-ne’e. Tanba ne’e, se bele ita-nia Governu mai hadi’a lalais uma sira-ne’e,” nia dehan.
Iha fatin seluk, Prezidente Autoridade Munisípiu (PAM) Dili, Guilhermina Filomena Saldanha Ribeiro “Margi”, hateten oras ne’e daudaun Autoridade Munisípiu Dili nia responsabilidade mak halo jestaun ba lixu iha jardin no uma gazebo iha tasi ibun Areia Branca ne’e la’ós Autoridade Munisípiu Dili nia responzabilidade atu hadi’a.
“Munisípiu Dili nia responsabilidade mak halo jestaun ba lixu iha Jardin. Mezmu iha dekretu-lei númeru 03 fó kbiit, maibé ita kuandu ko’alia uma sira iha Areia Branca, ita bele dehan fasilidade insfraestrutura ne’e sei iha MTCI ninia responsabilidade. Maibé hanesan Autoridade Munisípiu Dili asume mós responsabilidade hodi hato’o nafatin ba MTCI,” nia esplika.
Tuir nia, durante ne’e Autoridade Munisípiu Dili haree hela fatin turistiku iha Cristo Rei ne’ebé daudaun dadaun ne’e hetan estragu.
“Ami haree, maibé kompeténsia kona-ba infraestruturas iha jardin sira sei iha hela Ministériu Turizmu, liu-liu iha Gabinete Vice-Ministru Turizmo nia responsabilidade,” nia dehan.
Jornalista : Nelia Fernandes
Editór : Cancio Ximenes
