DILI, POLÍTIKA

PR Horta: relasaun bilaterál entre TL ho Indonézia metin nafatin

PR Horta: relasaun  bilaterál entre TL ho Indonézia metin nafatin

Prezidente Repúblika (PR), José Ramos Horta, partisipa serimónia resepsaun Estadu hodi komemora loron Proklamasaun Repúblika Indonézia ba dala-77 iha embaixada Indfonézia, faról. Tersa (13/09). Imajen/Mídia PR.

DILI, 14 setembru 2022 (TATOLI)—Prezidente Repúblika (PR), José Ramos Horta, tersa ne’e partisipa iha serimónia resepsaun Estadu hodi komemora loron Proklamasaun Repúblika Indonézia ba dala-77 ne’e, hatudu katak relasaun bilateral entre Timor-Leste (TL) ho nasaun viziñu Indonézia kontinua metin nafatin.

Notísia Relevante: PR Horta-NU NTT diskute kona-ba umanidade-toleránsia-rekonsiliasaun

“Eventu ne’e komemora lorom boot proklamasaun 17 agostu maibé foin hala’o. Ha’u mai partisipa iha ne’e no resepsaun animadu tebes, ne’ebé aprezenta provinsia hotu-hotu Indonézia nian, ne’ebé partisipa mós hosi Prezidente Parlamentu Nasionál, membru Governu no líder partidu polítiku sira hotu ne’ebé hatudu ita-nia relasaun di’ak loos ho Indonézia,” PR Horta hateten ba jornalista sira iha embaixada Indonézia, Faról.

Xefe Estadu hateten, atividade komérsiu no investimentu Indonézia barak mai iha Timor-Leste hodi apoiu dezenvolvimentu nasaun ne’e nian, no ho vizita ne’ebé nia parte hala’o ba Indonézia foin lalais, ba oin parte rua sei hamutuk dezenvolve liután ekonómia iha zona fronteira.

“Foin daudaun hanesan ita hotu hatene ha’u ba Jakarta hasoru Prezidente Joko Widodo no agora ha’u hatene Prezidente Joko Widodo ho Governu tomak sira hakarak duni hahú implementa buat ne’ebé ami ko’alia iha Jakarta kona-ba dezenvolvimentu fronteira ho Oé-Cusse no atividade seluk tan iha setór oioin,” nia hateten.

Tuir nia, Indonézia iha susesu boot liu-liu daudaun ne’e  Prezidente Indonézia, Joko Widodo, nia programa halo barazen iha Nusa Tenggara Timur (NTT).

“Ne’e mós ha’u husu ita halo iha ne’e bele fó apoiu tékniku ba Timor-Leste hodi bele halo kaptasaun ba udan-been ne’ebé foin daudaun ita haree susesu boot iha Nusa Tenggara Timur (NTT),” nia dehan.

Embaixadór Indonézia iha Timor-Leste, Okto Dorinus Manik, hateten Indonézia agora kompleta nia proklamasaun independénsia ba dala-77, ne’ebé iha tinan hirak ne’e relasaun bilaterál Indonézia ho Timor-Leste kontinua hametin liután iha setór ekonomia no diplomasia.

Ba oin, tuir nia, sei kontinua servisu hamutuk iha área fronteira nian hodi dezenvolve ekonómia liu-liu asuntu sira-ne’ebé Prezidente Repúblika Timor-Leste ho Indonézia foin lalais diskute iha vizita Estadu ne’ebé nia hala’o iha Indonézia.

Notísia Relevante: PR Horta: vizita Estadu kontinua hametin relasaun bilaterál TL-Indonézia

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!