DILI, 19 setembru 2022 (TATOLI)—Diretór Nasionál Biblioteka no Muzeu iha Sekertáriu Estadu Arte no Kultura (SEAK), João Fátima da Cruz, informa iha tempu badak ENI no Autoridade Nasionál Petróleu no Minerál (ANPM) sei fó sai kompañia nia naran atu halo konstrusaun ba biblioteka nasionál.
Notísia Relevante: SEAK-ANPM selebra akordu estabelese biblioteka nasionál
“Foin lalais, ita halo lansamentu primeira pedra iha fulan ida liubá no agora iha prosesu ida ba ona aviza komersiál entre ENI ho ANPM mak responzabiliza ba asuntu ne’e. Nune’e, semana kotuk ha’u telefóne ba ANPM husu informasaun kona-ba prosesu ne’e to’o iha ne’ebé ona, tanba sira mak responsabiliza ba asinatura fund agreement. Entaun, prosesu ne’e la’o ona no iha tempu badak nia laran sira atu aviza ona komersiál ba kompañia ne’ebé atu manán ba projetu refere,” João Fátima da Cruz hateten ba Agência Tatoli iha nia kna’ar fatin, Avenida Portugál, Dili, segunda ne’e.
Maibé, foin lalais kompañia iha preokupasaun uitoan kona-ba asuránsia ba saúde (seguransa sosiál) karik servisu atu hahú sé mak responsabiliza.
“Ida-ne’e mak agora sira sei rezolve hela no osan ne’ebé kompañia husu kuaze rihun $48-resin ba asuránsia. Entaun, sira entrega ba kompañia atu hola lai asuránsia Ciner Max nian, nune’e projetu ne’e hotu mak Governu responsabiliza fali ba orsamentu refere, hodi reembolsa fali sira-nia osan. Entaun, osan ne’e sei tama iha akordu MOU foin daudaun asina entre SEAK-ANPM,” nia dehan.
Aleind ene’e, SEAK hein ENI sei hamutuk ho ANPM atu asina fund agreement, nune’e bainhira asina hotu mak foin ba aviza komersiál.
“Ida-ne’e ita hein hela, maibé sira nafatin iha ona konkordánsia katak iha fulan oin mai iha ona aviza komersiál, ida ne’e la iha tan mudansa. Tanba ida-ne’e sei akontese buat tolu iha ne’ebá, hanesan asina fund agreement, aviza komersiál no aviza supervisaun konsultan ba ema-ne’ebé atu halo supervizasaun ba kompañia ne’ebé atu halo konstrusaun,” nia dehan.
Maske nune’e, tuir planu ne’ebé iha katak prosesu konstrusaun ne’e sei akontese iha fulan outubru tinan ne’e.
“Tuir konversa ne’ebé ami halo iha semana kotuk nia laran, sei la muda tan no nia tenke akontese duni iha fulan outubru nia laran,” nia dehan.
Notísia Relevante: Governu iha kompromisu harii Biblioteka Nasionál atu konserva livru
Jornalista : Nelia Fernandes
Editór : Cancio Ximenes
