DILI, 19 setembru 2022 (TATOLI)—Prezidenti Repúblika, José Ramos Horta, konsidera Xanana Gusmão ho ekipa iha espíritu fraternidade ho inisiativa realiza kompetisaun korál no vokál grupu tasa Avó Nana 2022 kona-ba “Fraternidade Umana”.
Notísia Relevante: Xanana Gusmão: “Papa Francisco kontente rona Timor-Leste proklama fraternidade umana”
“Iha inisiativa ne’ebé maun boot Xanana halo hamutuk ho nia ekipa sira, monu duni iha espíritu dokumentu fraternidade umana, ne’ebé Santidade Papa Francisco no Saserdote Musulmanu Al-Azhar, Ahmad Al-Tayyeb halo dokumentu ne’e bainhira sira partisipa hamutuk iha eventu boot ida religion for peace iha Abudhabi iha tinan 2019, bainhira Amu Papa ba Abudhabi primeira vés ba iha peninsula Arabika nian,” Xefe Estadu ne’e hateten liuhosi nia diskursu iha serimónia Grand Finál konkursu korál no vokál grupu tasa Avó Nana 2022 kona-ba “Fraternidade Umana”, iha salaun Delta Nova, segunda ne’e.
Ramos Horta akresenta, depois sira kria prémiu ida, prémiu ne’e naran human fraternity award no prémiu hahú iha 2019, 2020 no 2021.
“Ha’u simu konvite ba halo parte juri na’in-lima no serbisu hamutuk ho sira no iha agora ha’u simu ne’e koensidénsia ne’e, ba iha Prezidente Repúblika ne’ebé fó plátaforma ida di’ak liután para promove nafatin letra no espiritu human fraternity declaration. Ita-nia parlamentu adota tiha ona iha fulan maiu no agora ideia ne’e serteza atu depois adapta tan kuríkulu eskolár ne’e iha ona igreja-nia liman, liuhosi instituisaun akadémika pedagojika igreja nian, nune’e husu Governu para oinsá dokumentu ne’e adapta ba kurríkulu eskolár. Klaru tenke liuhosi Ministériu Edukasaun para aprova, ne’e importante para hahú kedas iha eskola ita aprende tau iha ita-nia kultura,” nia dehan.
Ho nune’e, Xefe Estadu apoia kompetisaun korál no vokál grupu tasa Avó Nana 2022 kona-ba “Fraternidade Umana” no husu atu kontinua ba oin nafatin.
“Apoia 100% ba inisiativa ida-ne’e. Favór kontinua halo, halo tan no halo nafatin,” nia dehan.
Notísia Relevante: PR Horta-Vise PM Santa Sé lansa Sentru Fraternidade Umana Timor-Leste
Jornalista : Nelia Fernandes
Editór : Cancio Ximenes
