DILI, 19 setembru 2022 (TATOLI)—Reprezentante Xanana Gusmão no atuál Sekretáriu Jerál Partidu CNRT, Francisco Kalbuady Lay, hateten Amu Papa Francisco sente kontente bainhira Xanana Gusmão informa ba nia katak Timor-Leste adota no proklama dokumentu fraternidade umana hodi kria pás mundiál.
Notísia Relevante: Xanana Gusmão: “Papa Francisco kontente rona Timor-Leste proklama fraternidade umana”
“Amu Papa Francisco tau importánsia boot tebes ba iha atividade kona-ba fraternidade umana, hodi nune’e ita hotu, nu’udar ema bele fahe sentimentu respeitu malu, fó domin ba malu no apoiu malu iha ita-nia vida. Amu Papa Francisco kontente bainhira ha’u informa katak iha Timor-Leste ita buka halo tuir ninia hanoin, liuhosi atividade sira hanesan, relijiaun labele fahe ita, liuhosi relijiaun ida-idak, ema ida-idak tenke hatudu katak ema seluk la diferensa ho nia, tanba hotu-hotu Maromak nia oan,” Francisco Kalbuady Lay, lee sai Xanana Gusmão nia diskursu iha serimónia grand finál Corál no Vokál Grupu grupu konsilidasaun ba Fraternidade Umana “Tasa Avo Nana 2022”, iha salaun Delta Nova, Díli, segunda ne’e.
Povu Timor-Leste tenke haksolok tanba rai ne’e maioria Katólika, hosi ne’e seidauk mosu violénsia entre relijiaun ka deskrimina malu, seidauk mosu violénsia entre relijiaun, tanba ne’e timoroan nia dever agora mak hatutan espíritu ida-ne’e ba joventude hodi hapara tiha violénsia, nune’e povu tomak bele moris iha kultura respeita malu, iha domin no dame nia laran.
Aleinde ne’e, Xanana Gusmão mós hato’o susesu ba partisipante ka konkorente sira-ne’ebé partisipa iha grupu corál no vokál grupu, tanba sei sai susesu ba povu tomak no ba timoroan sira hotu.
“Hosi ne’e, ha’u lori ita hotu nia naran hato’o parabéns ba Prezidente Repúblika, José Ramos Horta, ne’ebé eleitu nu’udar Prezidente ba povu tomak,” nia apela.
Notísia Relevante: Papa Francisco agradese esforsu TL promove dame no toleránsia
Papa Francisco sei hala’o enkontru ho Xanana Gusmão iha 25 agostu
Jornalista : Nelia Fernandes
Edítor : Cancio Ximenes
